WILLEMSTAD – Anke ya por a inskribí online atraves di e wèpsait www.ridefortheroses.net di fundashon Ride for the Roses pa partisipá na e di 13 edishon di Ride, Swim & Walk for the Roses riba djadumingu 29 di yanüari, henter e siman aki por inskribí físikamente tambe na e spònser prinsipal Orco Bank na Lanthùis Cerrito (Schottegatweg Oost s/n).

Ta keda rekomendabel pa inskribí online pa despues presentá ku e formulario na man den kurá di Orco Bank for di awe djaluna 23 di yanüari te i ku djabièrnè 27 di yanüari di 08:30 or di mainta pa 03:30 or di atardi pa paga i tuma e flanèl di partisipante. Aya por inskribí tambe manualmente, miéntras ku esei ta posibel tambe ainda riba djasabra 28 di yanüari entre 09:00 or di mainta i 04:00 or di atardi. Na Orco Bank por optené tambe informashon, manera tokante e diferente rutanan, orario, etc. Riba e wèpsait www.ridefortheroses.net tambe e detayenan ta optenibel. Pa gana tempu ta kumbiní pa esnan ku a inskribí online presentá ku un kopia di nan formulario di inskripshon ku tur nan datonan na man ora di paga i buska e flanèl.

Pa loke ta e kontribushon lo siguiente. Pa hóbennan te 12 aña ta konta un pago di 15 pa persona pa partisipá na un di e aktividatnan. Si nan partisipá na mas ramo di deporte esaki ta bira 20 florin. Pa kada ken di 12 aña bai ariba ta konta un suma di 20 florin pa persona pa ta den un aktividat so. Si ta partisipá na dos òf mas parti di e programa e kontribushon ta bira 30 florin pa persona. Solamente pa esnan ku ta landa pa kompetensia, e suma ta 30 florin pa persona, i si nan partisipá na mas aktividat esei ta bira 40 florin.

Ta bon pa bolbe anotá ku pa Swim por inskribí únikamente online. Pa esnan ku no a logra òf a lubidá, na Orco Bank lo tin algun laptop di moda ku por inskribí online aya mes. Kada inskripshon ta duna derecho riba un flanèl di partisipante i refresko despues ku yega e final.

MTB

Tin dos ruta pa e Walk for the Roses: 7.8 km (riba brùg Juliana) i 5 km (riba brùg Emma). E Swim for the Roses ta kuminsá na Zanzibar na bahia di Jan Thiel i ta kaba na Mambo Beach/ BLVD. Pa e Ride for the Roses (riba baiskel) tambe por inskribí na Orco Bank. Tin un Easy Ride di 10 km i dos bike tour, di 40 i di 60 km. despues di konsulta serio a disidí pa kanselá e ruta pa esnan riba mountain bike (MTB). Despues di bastante konsulta a disidí pa e biaha aki kanselá e ruta di esnan ku ta kore mountain bike (MTB). E kantidat grandi di áwaseru di último lunanan a afektá e ruta aki seriamente i solamente esnan hopi vèrsá por kompletá esaki. Pa no kore niun riesgo sin tin nodi, a skrap esaki for di e programa. Klaro ku esnan di MTB por partisipá na e otro karedanan riba kaya.

Spònsernan

E aña aki e fundashon por konta atrobe riba respaldo i koperashon, aparte di Orco Bank komo spònser prinsipal, di e patrosinadornan ‘platinum’ Bon Intenshon, Curaçao Port Services, Guardian Group, Curaçao Airport Partners, Gillette, i Curoil mas un kantidat grandi di ko-spònser ku ta mes tantu apresiá.

Randhy Cuevas

Na e diferente aktividatnan di djadumingu 29 di yanüari, kuminsando na Walk for the Roses, hende por saka potrèt ku e gran deportista Randhy Cuevas. E tambe ta kana i e ta dispuesto pa saka potrèt ku esnan interesá na salida na Awasá i alo largu di e ruta (riba brùg Juliana òf na final na Mambo Beach/BLVD). E ta spera si ku e hendenan lo ta dispuesto tambe pa hasi un donashon èkstra, loke tambe ta destiná pa fundashon Ride for the Roses, ke men pa kombatí kanser i guia pashènt di kanser loke ta den bon man serka Fondo Prinsesa Wilhelmina. Djadumingu dia 15 di yanüari Randhy Cuevas a subi Seru Kristòf 15 biaha i ku esei el a rekoudá mas ku 27 mil florin pa e fundashon Ride for the Roses ku 29 yanüari awor ta organisá i kordiná e djadumingu deportivo aki.