Willemstad – E tim di Music & Memory Curaçao ta invitá bo pa bin mira e pelíkula dokumental ‘Alive Inside’.

ALIVE INSIDE ta sigui e fundadó di Music & Memory Dan Cohen durante di su biahe pa aktiva persona nan ku Alzheimer òf otro forma di demensia dor di hasi algu simpel i profundo manera laga nan skucha nan musika faborito. E pelíkula a gana e premio di públiko di Sundance Film Festival den 2014 i a keda estrená durante di International Film Festival na Rotterdam i na Kòrsou den 2015.  E pelíkula ta duna un bista amplio di uso di musika personalisá via IPODs pa persona nan ku demensia i tambe ta mustra e efekto kurativo ku musika por tin den trese milager kaminda tratamentu tradishonal ta kai chikí.

E invitashon aki ta spesial pa famia nan ku ta kuida un persona ku Alzheimer of un otro forma di demensia. E meta di e presentashon di pelíkula ta pa informá abo i bo famia tokante di e kontenido di e proyekto di Music & Memory Curaçao i e importansia di e proyekto aki pa nos komunidat pero tambe e posibilidat nan práktiko ku e por ofrese na bo famia.

E presentashon di e pelikula ta djasabra mainta, 28 di yanüari, 2017 na Cinemark, Sentro Komersial Sambil. Trailer di e pelíkula ALIVE INSIDE I mas informashon tokante di e pelikula por ser mira riba e siguiente e wepsait www.aliveinside.us

Registrá bo luga awor, paso e luga nan ta limitá. E pelikula ta gratis. Bo por yama un di e siguinte number nan pa mas informashon i pa reserva bo lugá. Yama Curaçao Cares +5999 7881952 òf Stichting Alzheimer Curaçao +5999 4623900 riba djaluna, djarason of djabièrne entre 9:00AM i 12:00PM. E lo ta un presentashon di pelíkula interesante durante kual nos lo apresiá bo presensia. Nos ta spera di por yamabo bon bini durante djasabra mainta, 28 di yanüari 2017 proksimo.