WILLEMSTAD;- For di komienso ya kaba Ir-Sais a demostrá su mes komo un artista versatil, e por fásilmente sinti su mes na kas den género musikal ritmo kombiná, pero loke su kurason ta bati p’é ta e zouk. Esaki ta keda konfirmá ku un sin fin di éksito ku ya kaba e tin na su nòmber. Su afiliashon na Cache Royal tabata plataforma ideal pa a laga fanatikonan sera konosí ku su músika, su manera di skibi i e manera ku e ta presentá. Awor, tumando un rumbo un poko mas ‘solo’ su konsentrashon ta dirigí na e ‘zouk’ ku un akuerdo di Sony bou di su brasa, Ir-Sais ta eksplorando tur variashon di zouk. Su fanatikonan ta enkantá! E solo echo, di a alkansá 200,000 mira (views) riba YouTube den 1 luna di tempu pa ‘Nada No ta Pasando’ piesa den kolaborashon ku otro kantantenan lokal manera Enmeris i Hef ta muestra ku su estilo ta kai den bon tera.  Awe, un otro piesa ta mira lus di dia; un klásiko di Boyz to Men – “Water Runs Dry” vershon zouk i reprodusí estilo di Ir-Sais ~ “Esta dushi e kos ki ta…”.  Pidi p’e na bo stashon di radio faborito.