Willemstad – JCI IOBA Curaçao tabata tin 15 di December ultimo, su selebrashon di fin di aña. Durante di e selebrashon aki JCI IOBA Curaçao a hasi entre otro un donashon chiki na
Curaçao Zoo, komo apoyo pa nan gran trabou ku nan a bin ta hasi. Curaçao Zoo ta un di e partner nan ku JCI IOBA Curaçao a traha kune e aña aki. Den bista di klousura di aña, JCI IOBA Curaçao ker a gradisi tambe tur otro partner ku a traha kune e aña aki. Tabata un aña di inovashon i reto nan grandi pa e organisashon. Asina JCI IOBA Curaçao a traha riba 3 proyekto importante pa nos komunidat. Esaki nan tabata Debate Politiko/Exit Poll, Nothing Physical – Kibra tabu tokante salu mental i tambe un app pa mucha yamá Un Buki Pa Lesa.

Tambe JCI IOBA Curacao tabata tin representashon internashonal. E organisashon tabata tin dos miembro ku tabata den direktiva internashonal. Banda di esei miembro nan di JCI IOBA Curacao a forma parti di ekipo nan di debate ku a gana internashonal mente na dos okashon. Tur loke a keda logra aki, ta danki na trabou duru di e miembresia, apoyo di partnernan i komunidat kompletu den su totalidat. JCI IOBA (Involvment of Banda Ariba) Curacao ta un organisashon local ku ta forma parti di e red global di Junior Chamber International (JCI). JCI ta un organisashon di hoben nan aktivo entre 18 pa 40 aña ku tin komo meta pa krea impakto positivo den komunidat. JCI IOBA Curacao hutnu ku 5 otro kapitulo ta forma parti di JCI Dutch Caribbean. JCI IOBA Curacao lo kuminsa su aña kalendario nobo dia 11 di Januari 2018 na Landhuis Chobolobo ku entre otro instalashon di e direktiva nobo pa aña 2018. Pa mas informashon por check e pagina di facebook JCI IOBA Curacao.