Willemstad – Pronto e kompetensha pa saka e empresario hóben di mas kreativo di Kòrsou ta tuma lugá. Esaki ta di seis biaha ku JCI IOBA Curaçao i Banco di Caribe ta organisá e proyekto eksitoso “The Creative Young Entrepreneur Award” ku tin komo meta stimulá hóbennan pa bira empresario. Inskripshon ya a habri pa e kompetensha aki. Den e kuadro aki JCI IOBA Curaçao i Banco di Caribe a organisá un anochi di informashon na training center di Banco di Caribe. E anochi tabatin komo propósito pa informá interesadonan mas riba e proyekto su rekisitonan pa asina hasié mas aksesibel pa nan por inskribí i bira partisipante. JCI IOBA (Involvement of Banda Ariba) Curaçao ta un organisashon lokal ku ta afiliá na Junior Chamber International (JCI). JCI ta e federashon mundial di lidernan entre 18 pa 40 aña ku ta dediká na trese kambio positivo den nos komunidat.  Meskos ku tabata e kaso den e edishonnan anterior, Banco di Caribe komo patrosinador prinsipal, ta buta un promé premio di NAf. 10,000 disponibel pa e ganador di e kompetensha di CYEA. E ganador por usa e premio aki pa invershon den su empresa. Oradornan riba e anochi a inkluí sr. Fons Simon, direktor di Banco di Caribe, D’angelo Alexander presidente di JCI IOBA Curaçao I tambe Ingemara Bak komo direktora di e proyekto CYEA. E próksimo evento pa CYEA lo ta e Trainings Day kual lo ta grátis pa tur hende ku registrá. Esaki lo tuma lugá dia 19 di aprel próksimo. E trainingnan lo ta bai  ta en konekshon ku e tema di e aña aki kual ta ‘’Inject the Entrepreneurial DNA’’. Ta bai duna e empresarionan hèrmèntnan nesesario pa por sobrebibí tur e retonan ku tin awendia ora di hasi negoshi. Por kuminsá registrá mandando un email na cyea.curacao@gmail.com òf bishitá e websáit www.iobacyea.com. Pa mas informashon tokante CYEA 2014 manda un email pa cyea.curacao@gmail.com of bishita www.iobacyea.com òf bishita e página di facebook di JCI IOBA Curaçao.