Willemstad- Pronto e kompetensha pa saka e empresario hóben di mas kreativo di Kòrsou ta tuma lugá. Esaki ta di seis biaha ku JCI IOBA Curaçao i Banco di Caribe ta organisá e proyekto eksitoso “The Creative Young Entrepreneur Award” ku tin komo meta stimulá hóbennan pa bira empresario. Inskripshon ya a habri pa e kompetensha aki. Tur aña JCI IOBA (Involvement of Banda Ariba) Curaçao ta organisá e proyekto aki. JCI IOBA Curaçao ta un kapitulo lokal ku ta afiliá na Junior Chamber International (JCI). JCI ta e organisashon mundial di lidernan entre e edat di 18 pa 40 aña ku ta dediká na trese kambio positivo den nos komunidat. Meta di e proyekto CYEA ta pa rekonosé, i honra ekselensia di empresarionan na Kòrsou. Pa medio di e proyekto aki e ròl di kreatividat den nan forma di produsí òf duna servisio ta keda enfatisá. Tambe JCI IOBA Curaçao ke stimulá hóbennan den nos komunidat pa bira empresario. Esaki ta di seis okashon ku JCI IOBA Curaçao ta organisá e proyekto aki. Meskos ku tabata e kaso den e edishonnan anterior, Banco di Caribe komo patrosinador prinsipal, ta buta un promé premio di NAf. 10,000 disponibel pa e ganador di e kompetensha di CYEA. E ganador por usa e premio aki pa invershon den su empresa. P’esey JCI IOBA Curaçao i Banco di Caribe ta buskando e empresario yòn i kreativo ku a kuminsá un negoshi nobo òf a krea kambio positivo den un negoshi eksistente desaroyando un produkto òf servisio nobo, introdusiendo kambio den proseso di negoshi, merkadeo, òf solushonando un problema di un forma kreativo. E tema di CYEA e aña aki ta ‘’Inject the Entrepreneurial DNA’’ pa duna e empresarionan lo nesesario pa por  sobrebibí tur e retonan ku tin awendia ora di hasi negoshi. . E próksimo 3 lunanan aki JCI IOBA Curaçao ta organisá den kuadro di e proyekto aki diferente aktividat, manera anochi di informashon i dia di training. E kulminashon di e proyekto ta e premiashon di e empresario hóben di mas kreativo di 2014. Tur empresario entre 18 i 40 aña por partisipá pa Creative Young Entrepreneurship Award 2014. E proseso di nominashon ta simpel. E empresario por inskribí su mes òf por wòrdu nominá dor di un otro persona. Un hurado konsistiendo di personanan konosí i/òf eksitoso aktivo den e áreanan empresarial i ekonómiko lo skohe e ganador for di e inskripshonnan.. Bo ta un empresario hóben i kreativo? JCI IOBA Curaçao i Banco di Caribe ta invitá abo pa partisipá den e Creative Young Entrepreneur Award 2014! Pa mas informashon,por bishita nos wepsáit www.iobacyea.com òf e-mail na cyea.curacao@gmail.com.