Willemstad – JCI IOBA pa di 6 biaha ta organisá un Master Class pa yuda organizashonnan kontribuí na desaroyo di e merkado ku ta duna nan e oportunidat di hasi negoshi i sigui duna impulso na nos ekonomía. E tema di e aña aki ta dirigí riba e responsabilidat sosial (CSR) ku organizashonnan mester tin pa por kontribuí na un mihó Kòrsou. Ku e proyekto akí JCI IOBA ke ilustrá ku ‘CSR’ ta indispensabel den eksistensia di kompanía. Kon nos por implementá i biba CSR? Kon e kursante mes por siña e abilidat akí i pasa esaki pa direktiva i e kolega na trabou? E Master Class aki lo aportá na konsientisashon i duna hèrmèn pa implementashon di CSR tantu na mundu empresarial di Kòrsou komo na konsumidó, gobiernu i otro instansia. Durante e Master Class lo trata in ekstenso e parti di responsabilidat i e sentido pa esaki i su desaroyo. Lo pone enfasis riba inkorporashon di CSR den prosesonan di kompanía di un manera práktiko. E kontenido di e tópikonan ku e entrenadónan ta bai presentá ta dirigí riba e importansia di konsientisashon i desaroyo riba tereno di pensamentu struktural di durablilidat, aktuá i produsí i responsabilidat sosial. E entrenadónan ta profeshonal riba tereno di CSR i ta bini di Kòrsou i di eksterior: Sr. Patrick Knight (Estados Unidos), Sra. Okama Ekpe-Brook (St.Maarten), Dr. Ralf Wieriks (Kòrsou), Sr. Kurt Schoop (Kòrsou). Di akuerdo ku sr. Wieriks: “Mundu lo ta duradero na e momento ku nos atendé ku otro di un manera honesto i étiko, ku e rekursonan ku nos tin na nos disposishon i ora nos por ta transparente tokante di esaki. Mi ta di opinión ku empresario ta atendé ku esaki di un manera mas sabí ku hende den komunidat ta realisá. No laga empresanan engañabo ku tur e kosnan bunita i kariñoso ku nan ta hasi. Durante e Master Class nos lo elaborá profundamente riba responsabilidat”. E kurso di 2 dia ta tuma lugá djamars dia 10 di yüni i djarason 11 di yüni 2014 di 8.30 ‘or di mainta pa 5 ‘or di atardi den e edifisio moderno di AmiDos na Parera. Un dia di kurso ta kosta $399 pa persona i tur dos dia ta kosta $599 pa persona i ta inkluí tur material di kurso, foyeto, ‘hand-outs’, almuerzo, pausa, sertifikado i un ‘happy hour’ na final. E JCI IOBA Master Class ta konta ku koperashon di PwC Dutch Caribbean, Insel Air i Go Weekly. Pa mas informashon i registrashon por bishitá e wèpsait di JCI IOBA; www.jciioba.com 
Pa mas pregunta por tuma kontakto ku e ‘project director’ Sr. Richney Philipa na 526 0625.