WILLEMSTAD – JCI United Citizens of Curaçao (JCI UC) a inisiá aña 2015 ku nan promé Reunion General den kual a instalá e direktiva nobo ku ta responsabel pa maneho di e organisashon i tambe ehekutashon di e plannan pa ku e aña aki. Durante e Reunion General a trata varios proyekto ku ta forma parti di e plan di akshon di 2015, entre otro kontinuashon di Manera mi bos no tin dos i e prome edishon di Feria di Konosementu. Aparte di e kantidat di proyekto ku tin pendiente e aña aki ta unu hopi importante i speshal pa e organisashon komo ku ta selebra 100 aña di e moveshon di Junior Chamber International (JCI). Netamente pa esaki Senador Steven Luoisa a duna un presentashon ku sigur ta un balor agregá pa tur ku tabata presente: “Know your past, to determine your future”. Pa por selebrá 100 aña di impakto kaminda siudadanonan yòn i aktivo ta uni pa krea kambionan positivo, tabata na su luga pa por a risibi Vise Presidente 2015 di JCI, Candice Henriquez ku a duna aun mas tantu konosementu di e historia di JCI. Ta asina ku e fundashon aki ta konsistí di miembronan dinámiko i determiná pa traha riba proyektonan ku ta enfoká riba diferente nesesidat primario di den nos komunidat. E lema di e aña aki ta “Learn and Lead”. Di e forma aki JCI UC kier empoderá su miembronan riba e tereno di liderazgo i tambe ekipá nan ku konosementu pa garantisá kalidat den tur lokual nan ta hasi pa krea kambionan positivo na un manera impaktante. Aparte di e entusiasmo i trabou duru ku ta rekerí pa duna un aporte na nos komunidat realisashon di e esfuersonan aki ta solamente posibel ku e rekursonan nesesario i e fondonan disponibel. Si abo komo individual of instansha ta sinti bo mes yamá pa kontruibí ku nos komunidat pero no tin e tempu pa traha intensivamente den un proyekto, ta posibel pa hasi un donashon na:

JUNIOR CHAMBER INTERNATIONAL UNIVERSITY OF THE DUTCH CARIBBEAN

KAYA BASRALOKUS 73 MCB 022984409

I por último nos kier enkurashá tur studiante i tambe alumno ku tin di hasi proyekto boluntario pa skol pa tuma kontakto ku nos. Tin espasio pa boso tambe forma parti di algun proyekto pa asina kumpli ku bo tarea di skol bou di guia di direktiva di JCI UC. Nos kier a yama un danki pa boso sosten den 2014 i ta spera di por konta ku sosten di e bon yu di Kòrsou durante e aña aki tambe.