WILLEMSTAD – JCI United of Curaçao (JCI UC) a konosé su di nuebe Hunta di Direktiva ku ta bai kontinuá ku e tremendo trabounan di añanan anterior.

Hunta di Direktiva 2017 ta konsistí di Presidente di 2016 Luigi Louisa, Vise Presidente Shamir Welvaart, Tesorero Roxanne Martis-Martina, Sekretaria Vanja Wanga i enkabesá pa Presidente 2017 Nashantara Römer. Kada un miembro di Direktiva tin un aña pa liderá i sirbi e organisashon pa asina por logra e metanan stipulá i krea e impakto positivo ku e organisashon ta para p’e. Huntu ku demas miembro di e organisashon ta bai ehekutá e plan di akshon pa e aña aki.

JCI UC ta konosí den komunidat pa diferente di su proyektonan komunitario i duradero ku ta enfoká riba e metanan di desaroyo duradero di Nashonnan Uní. Aki ta referí na Manera mi BOS, No tin DOS ku ta dirigí riba hóbennan entre 14 pa 21 aña. E ta un kompetensha di debate ku ta inkluí un periodo preparatorio di tayer i kurso pa asina e hóben partisipante por mehorá su abilidat pa debatí, duna presentashon dilanti un públiko, i siña dominá nos idioma materno, esta papiamentu. CurBiz ta un otro proyekto impaktante di JCI UC ku ta enfoká riba personanan ku ta aspirá pa bira empresario òf ku ya kaba a kuminsá ku nan propio negoshi i ku tin e nesesidat pa guia i fondo. Aki e partisipantenan ta risibí diferente training i tayer pa ampliá nan konosementu di e mundu di empresa i mehorá nan abilidat pa bende nan negoshi na posibel finiansadonan.

Aparte di e proyektonan ariba menshoná tin hopi mas tantu plan ku mester wòrdu kristalisá. Pues un i tur ta bon bini pa djòin un di nos proyektonan. Pa mas informashon por bishitá nos Reunion General pa Miembresia ku ta tuma lugá riba e último djaweps di tur luna ku eksepshon di luna di aprel. E siguiente Reunion General ta bai tuma lugá riba djarason 26 di aprel na Floris Suite Hotel den White Room di 8:00pm pa 10:30pm. Pa sigui delaster un akontesimentu bishitá. nos página di Facebook JCI United Citizens of Curaçao. Por drenta den kontakto ku nos na jciuccuracao@gmail.com.