Manera ta e tradishon pa 29 aña kaba, e aña aki un bes mas JCI Willemstad a duna atenshon na e promé beibi ku a nase. E aña aki St. Elisabeth Hospital tabatin e honor pa yuda trese e yu muhe Naomy Maria Martis na mundu. El a nase awe mardugá pa 5:35 am ku e peso di 2730 gram i e midí di 49 cm. Su orguyoso mayornan ta Dairys Monte-Martis i Robertico Martis. Un legria inmenso a reina na departamentu Anna Paviljoen, na momentu ku dòkter A. Henriques asisti pa zuster A. Martis a yuda trese e chikitin na mundu. Bishita Ku sosten di algun patrosinadó, direktiva di JCI Willemstad a sorpresá mayornan i yu ku varios regalo. Un bes mas JCI Willemstad a konta ku aporte di Hermanus Jewelers, Say Cheese Photography (antes Foto Studio Kort) a regala un bale pa saka potrèt, i Highlight Enterprices (artíkulonan di uso pa yu). For di 2011 Curaçao Foods Trade a bin ta ofrese Pampers na e promé beibi i e aña aki a añadi habon pa laba paña Dreft pa un aña largu na e regalonan. Curaçao Foods Trade ta orguyoso di por ofrese un aña largu Pampers na e “Official Pampers Baby 2015. Banda di tur e artikulonan aki, beibi Naomy a haña un bunita plakat komo rekuerdo ku e ta e promé yu di aña, meskos ku tur su otro predesesornan, serka JCI Willemstad. Miembronan di direktiva di JCI Willemstad a bishitá e mayornan na SEHOS pa felisitá e famia di e yuchi i a hasi entrega di tur e regalonan. Presidente di JCI Willemstad, Junalis Zelagas, a ekspresá su legria ku yegada di e yuchi i tambe felisitashon na su mayornan. Un danki spesial ta bai na tur spònsernan ku ya pa hopi aña ta karga ku e proyekto aki i tambe na SEHOS pa e hospitalidat. JCI Willemstad JCI Willemstad ku su 53 aña di eksistensia no ta un organisashon deskonosi na Kòrsou. E ta un organisashon “non-profit” ku ta enfoká riba liderazgo i formashon di personanan entre 18 i 40 aña. E mishon di JCI ta pa kontribuí na desaroyo global di nos komunidat dunando hóbennan e oportunidat pa desaroyá nan abilidat di liderazgo i responsabilidat sosial nesesario pa asina krea kambionan positivo. Keda pendiente pa plan nan grandi ku JCI Willemstad tin pa aña 2015!