Pueblo di Kòrsou ya a kustumbrá pa mas ku 32 aña kaba kon JCI Willemstad ta duna atenshon na e promé beibi di aña.

E aña aki St. Elisabeth Hospital ta yama bon biní na e promé yu di aña 2018 ku yama Kaleb Aurelien. Ela a nase 3:21 AM, ta pisa 3010 gram i ta midí 51 cm. Su orguyoso mayornan ta mama Yanitte Aurelien i tata Cinicier Aurelien. Un legria inmenso a reina, na momentu ku partera ass. Kolfschoten asisti pa zuster J. Montroos a yuda trese e beibi na mundu.

Bishita

Miembronan di direktiva di JCI Willemstad, kompaña pa algún patrosinador a bishitá e mayornan di e beibi pa felisitá i sorpresá nan ku algún regalo i opsekio. Presidente di JCI Willemstad, Vanessa Overman, a ekspresá su legria ku yegada di e beibi i tambe a duna felisitashon na e famia. Un danki speshal ta bai na tur spònsernan ku ta karga ku e proyekto tur aña di nobo.  Curaçao Food Trade a regala e beibi un pakete di pampers i wipes. E promé beibi di aña ta risibí pampers pa hinter aña 2018. Ennia a opsekia un babybox. Manrique Capriles a hasi un donashon di produktonan Johnson&Johnson, Say Cheez Photography un giftcard pa saka potrèt, unregalito di Superkidz, Highlight a opsekia produktonan di Zwitsal i un giftcard i Freeport Jewelers a regala Kaleb Aurelien un bunita armband di oro. I por Ultimo Salas sport shop a regala un plakaat memorable.

JCI Willemstad

JCI Willemstad ku su 56 aña di eksistensia no ta un organisashon deskonosí na Kòrsou. E ta un organisashon “non-profit” ku ta enfoká riba liderasgo i formashon di hóbennan entre 18 i 40 aña. E mishon di JCI ta pa kontribuí na desaroyo global di nos komunidat dunando hóbennan e oportunidat pa desaroyá nan abilidat di liderasgo i responsabilidat sosial nesesario pa asina krea kambionan positivo den nos komunidat.

JCI Willemstad te deseá pueblo di Korsou un aña 2018 yená ku prosperidat i tur klase di éksito