Dianan 27, 28 y 29 di november proximo
ORANJESTAD, Aruba – 29 di october 2015: Comision re – apertura Joe Laveist Sport Park hunto cu Aruba Sport Unie (ASU) a anuncia reapertura di Joe Laveist Sport Park dianan 27, 28 y 29 di november proximo cu diferente actividad y evento. Dia 27 di november e apertura oficial di e facilidadnan ta tuma luga. Tico Lesire a menciona e diferente eventonan di Baseball, Beach Volleyball & Beach Tennis, Domino y entretenimento en bibo. Lo tin diferente premio durante e dia aki pa celebra reapertura di e compleho deportivo. For di ocho deporte participando, 3 lo ta internacional incluyendo encuentronan entre Corsou y Aruba. Den baseball, lo tey Wild Cats di Corsou, mientras cu pa Beach Volleyball lo tin 3 team masculino cu lo midi forsa cu e atletanan di Aruba. Rhadames Dijkhoff, kende a lanta na San Nicolas y den bisindario di e Sportpark a hunga como mucha hopi biaha riba e veld na Joe Laveist Sport Park, ta e deportista cu ta encarga pa organisa e All Star Game hunto cu Antonio “Joselito” Albertsz di “Celebrity Baseball Madness”.
E evento tin un impacto hopi grandi , e All Star Game, ta invitando streanan di baseball di Major League “MLB” pa hunga un wega amistoso contra un team di hobennan Arubano cu ta destacando den e deporte. Esunnan cu lo ta presente ta e tres rumannan Molina, Yadier Molina catcher originalmente di Puerto Rico, cu ta hunga cu St. Louis Cardinals, Jose Molina di Tampa Bays Rays y Bengie Molina ex hungado di Los Angeles Angels. Tambe lo ta na Aruba pa e All Star Game ,Vladimier Guerrero, ex hungado di Los Angeles Angels, Vladimier Guerrero Jr., ta un Canades Dominicano cu recientemente a firma cu Toronto Blue Jays, Melvin Mora, Venezolano, ex hungado di Baltimore Orioles, Magglio Ordonez, Venezolano, ex hungado di Tigers ,Pedro Strop, Hulandes, hungado di Chicago Cubs y ex hungado di Orioles 10. Fransisco Liriano, Dominicano, hungado di Pittsburg Pirates y Juan Uribe di New York Mets.
Joe Laveist Sport Park tin luznan nobo, tribuna y daknan di tribuna nobo, un score board moderno cu ta traha cu “remote control”, facilidadnan pa reporteronan transmiti wega, un veld completamente renoba y un “zandbak” pa haci e deportenan di beach, manera beach volleyball. E di tres fase di e renobacion y expansion di Joe Laveist Sport Park ta encera construccion di dos sala grandi pa “indoor sports facilities”, manera taekwondo, basketball, karate, boxeo, etc. Despues di su apertura oficial Joe Laveist Sport Park ta bek na disposicion di San Nicolas y e comunidad di Aruba en general. Hinca e fecha den bo agenda, e invitacion sigur ta pa un y tur en special e hubentud pa bin disfruta di deporte cu lo inicia cu e re- apertura dia 27 di November, 28 di November e MLB all Stars Game y diferente weganan dia 29 di November.
“Take me back to the Ball Game!”