Ban sigui traha hunto pa por logra mas

ORANJESTAD, Aruba – November 2015: “Prome cu tur cos, prome cu mi lubida, laga mi yama un danki special na tur cu a aporta na e proyecto aki. Tin cu a aporta dor di sponsor, Lotto di Aruba a aporta financieramente y Fundacion Facilidadnan Deportivo a traha incansablemente di dia y anochi pa por logra e proyecto”, asina Minister di Salud Publico y Deporte, dr. Alex Schwengle, a duna di conoce na ocasion di apertura di Joe Laveist Sport Park diabierna anochi.

“Pa mi, mi ta mir’e como un simbolo di un chens nobo cu nos tin pa inyecta energia nobo y positivo den deporte, specialmente den e deporte di baseball”, asina e mandatario encarga cu maneho di deporte a sigui bisa.

Minister dr. Alex Schwengle a expresa su deseo pa e deportistanan mes mira e gesto aki como un empuhe di parti di Gobierno, di parti di tur e instancianan cu tin di haber cu deporte, cu tur t’ey pa yuda.

“No tur ora e ta bay lihe manera nos kier. No ta tur ora e forsa ta manera nos lo desea, pero esaki ta djis pa nos demostra cu nos por”, segun Minister dr. Alex Schwengle. “Pa mi esaki ta pa mi apela na tur hende, pa nos sigui coopera cu otro, pasobra mi ta kere nos por logra mas”.

Na final e titular di deporte a expresa cu “Awor ta e stadion aki, e siguiente stadion ta di Dakota y esun di Noord, pasobra ambos ta den necesidad di un bon man di mantencion, specialmente esun di Dakota. Y kere mi cu nos lo traha duro, pa por logra su renobacion den e aña cu ta bin”.