“Mester traha riba un vishon komun i duradero i ehekushon efikas”

WILLEMSTAD – Den un komunikado Kámara di Komèrsio ta bisa ku mester pone nanishinan den un direkshon i traha huntu riba un vishon pa atendé puntonan di interes general manera solushonnan struktural pa nos ekonomia por krese. Un klima di invershon atraktivo i otro kondishonnan relativo na esaki lo stimulá invershonistanan, tantu lokal, komo internashonal pa krea i desaroyá negoshi. Esaki na su turno lo mester krea mas kupo di trabou i konsekuentemente baha sifra di desempleo. Un desaroyo positivo lo atraé no solamente kapital finansiero, pero alabes kapital humano pa yuda edifiká nos pais. Mas negoshi, kupo di trabou, i kresementu di nos poblashon produktivo, lo mester pèrkurá pa mas entrada pa Gobièrnu. Un ekonomia ku ta krese lo pèrkurá alabes pa oumentá i fortalesé forsa di kompra ku ta na benefisio di tur sektor. Pa yega na solushonnan duradero pa realisá kresementu di ekonomia, Kámara di Komèrsio, huntu ku otro organisashon partner a yega na 7 punto di lansa na kua mester dediká mas atenshon. E puntonan aki ta : Inovashon i Eksportashon, Imigrashon, Merkado Laboral i Enseñansa, Burokrasia, Ròl di Merkado, Privatisashon, Struktura Fiskal.

Ku un vishon komun i esfuersonan dirigí riba e puntonan ariba menshoná, ophetivonan di interes general manera entre otro mehorá nivel di enseñansa, di kuido di salú, kuido na gruponan ménos pudiente, mehorashon di infrastruktura, krea mas i mihó fasilidat por bira realidat. Un ekonomia ku ta krese mester nifiká tambe mas entrada pa Gobièrnu ku kua e por dediká mas na e puntonan menshoná, i dimes hasi mas na prevenshon.

Nos prestashon v.s. region

Estudionan realisá manera entre otro e rapòrt Economic Outlook 2015 di IMF ta mustra kla ku ekonomia di Kòrsou no a kana ku e mesun paso ku paisnan den region di Karibe último añanan. Tin tur indikashon ku ekonomia di region di Karibe lo krese por averahe ku 2 à 3 porshento, miéntras ku no por bisa meskos pa Kòrsou. Un estudio realisá pa TAC (Strategies for Sustainable Long Term Economic Development in Curaçao, April 2013) ta mustra ku Kòrsou a ‘score’ hasta 6 biaha mas malu ku paisnan den region. Esakinan ta señalnan indikativo ku nos mester kuminsá dediká atenshon na e shete puntonan menshoná pa por mehorá nos posishon kompetitivo. Kámara di Komèrsio ta konsiente ku ta tur sektor i organisashon mester uni forsa pa realisá e reto i manera semper ta habrí pa duna su aporte na bienestar di nos pais i su komunidat.

Potensial di Kòrsou i faktornan benefisioso

Kòrsou tin potensial i hopi faktornan na su fabor pa por realisá un kresementu ekonómiko struktural. Puntonan ku ta resaltá ta; ku nos ta parti di Reino Hulandes. Komo parti di Reino Hulandes nos tin akseso na ekspertisio riba hopi tereno, na enseñansa avansá i mas fasilidat manera esnan hudisial. E debe di estado ta relativamente abou. Nos sistema monetario ta stabil i inflashon tambe ta relativamente abou. Kòrsou tin un bon base di infrastruktura (hafnan, aeropuerto, telekomunikashon i kareteranan). Provishon di awa ta di kalidat i koriente ta bastante stabil. Nos posishon geográfiko ta hopi favorabel i nos ta basta serka di paisnan ku tin potensial pa kresementu ekonómiko i oumento di prosperidat. Nos tin entrada preferensial den merkadonan importante manera Europa i Estádos Unídos. Nos siudat tin e status di Herensia Mundial, klima ta atraktivo i tin disponibilidat di fuentenan marítimo. Nos ta for di zona di horkan i no tin un historia di kalamidat. Salario i sistemanan di seguridat sosial ta relativamente favorabel (hasiendo menshon si ku esakinan pa e situashon aktual ta bou di preshon).

Hopi faktor ku mester di atenshon pa subi bienestar i prosperidat

Kámara di Komèrsio ku esaki no ta bisa ku no a hasi uso di e faktornan benefisioso aki ku a kondusí na e nivel di bida ku nos tin aktual, pero ke remarká si ku nos por saka mas probecho di nos potensial i apliká e benefisionan mas optimal pa nos por saka mihó benefisio pa nos pais i su siudadanonan. Ku otro palabra por bisa ku tin espasio i posibilidat pa nos realisá un e kresementu ekonómiko asina deseá i nesesario. Hasiendo esaki nos lo oumentá nivel di bienestar i prosperidat pa e siudadanonan di Kòrsou.