Willemstad – Curaçao Footprint Foundation huntu ku Grupo Biná ta organisá un kaminata den e área di naturalesa di Wacawa djasabra 10 di yanúari parti mainta. E kaminata ta kuminsá 07.00 or di mainta i e grupo lo reuní for di 06.45 or di mainta na entrada di e área di Wacawa. E kaminata aki ta unu ku por ta difisil pa hende ku tin problema na pia of rudia, ya ku e ruta lo bai den e serunan di Wacawa. Durante e kaminata lo por mira varios paisahe úniko ku bista riba Seru Herónimo I tambe e serunan di Christoffel. Ta kana bai den direkshon di kosta pa disfrutá di e bunita bista di Playa Grandi kaminda por mira turtuga ku ta bin bishitá e área pa kome. Por organisá e kaminata aki danki na Famia Finies. E ruta lo tuma 3 ora i mei i e gastu ta 20 florin pa persona ku ta inkluí un kos di bebe, fruta fresku i ob. Ta importante pa bisti sapatu pa kana fuerte, un pèchi i bin ku awa adishonal pa bebe durante e kaminate I tambe krema pa evitá kimá di solo. E kaminata ta riba propio riesgo. Nos ta kana ku grupo chikitu i pa e motibu aki inskripshon ta nesesario. Por inskribí dor di yena e formulario di inskripshon riba e website www.curacaofootprint.org of dor di manda un mail pa info@curacaofootprint.org.