Jemyma Betrian ta na Kòrsou i ta preparando su mes huntu ku su coach Mike Polanen pa defendé su titulo kontra Christi Brereton di Inglatera. Esaki lo tuma luga dia 7 di yüni na Pechanga Resort & Casino na Merka. Durante e pelea aki, su  titulo di WBC Women’s Bantamweight World Title ta den wega. Fundashon Bon Intenshon ku tin ya 4 aña ta e úniko spònser di Jemyma Betrian, no kier a laga e oportunidat aki pasa bai, sin duna hóbennan di Kòrsou e chance, pa drenta den kontakto ku nos kampeon i mira di aserka kon e ta prepará pa su siguiente pelea. Esaki ta tuma luga djabièrnè awor pa 10or na Internationall School of Curaçao. Jemyma lo duna un demostrashon di 30 minüt, e lo demostra pa 10 minüt kon e ta train i despues lo konta esnan presenté kon e la bringa i yega den tòp. Despues lo tin oportunidat pa saka potrèt ku nos kampeon. Jemyma Betrian a nansé na Kòrsou na aña 1991 i a gana diferente kampeonato, entre nan e titulo profeshonal “Full Muay Thai Rules” di un di e organisashon mas renombrá, esta WBC. Banda di su titulo Muay Thai, Jemyma ta tambe kampeon Europeo profeshonal di bokseo. Entre su viktorianan mas resiente ta figurá esun di 30 di mart 2014 na China kaminda e la gana su pelea den 10 sekònde di e promé rònt. Su kontrenkante tabata un dama di Portugal i den final e la sa di gana di e kampeon mundial, e Chines Sanda. 15 di febrüari Jemyma a gana na San Diego di e Brazileño Thais Souza pa knock out. 19 di yanüari dje aña aki, e la gana un faha mas na Riom Fransia, kaminda den 2 minüt di e promé rònt el a gana di Kaia Semail (France, Brizon Gym Riom) i asina pone un titulo Europea mas riba su lista. Den kuminsamentu di su karera Jemyma a pèrdè 2 pelea i despues di e dos peleanan ei, te dia djawe ta solamente viktoria Jemyma konosé i mayoria di su peleanan el a gana nan pa sea knock out òf technical knock out.