Willemstad – Despues di su hitnan manera “Move Tur Montaña”, “Un Brasa So Mi Ke” i “Kalma E Tormenta” awor Shamiro Anita ta lansa su kantika nobo nobo titulá ‘Hala Un Rosea’.

Hopi biaha den bida nos ta purba ku tur nos forsa te kansa sin logra i nos ta dal kontr’e muraya. Nos tur por haña un mal notisia, konfronta situashonnan duru i/of momentunan ku preshon haltu. Ku e kantika nobo aki Shamiro ke sigura nos ku tin un alivio. Ku Dios tin un kontesta i ta dispuesto pa yuda.

Letranan di e kantika ta bisa “Hala Un Rosea I djis rekorda ku Dios tin e kontesta, ku semper lo e yuda. Nunka lubida ku Dios tin un bon motibu I E lo yuda. Despues di e prueba, E lo renoba tur bo forsa”.

Shamiro su orashon ta pa nos tur por keda trankil. Dios ta fiel i e tin un miho futuro plania pa bo. Deposita bo fe den Hesus i nunka lo E faya bo. Di kurason, Shamiro ta spera ku mas i mas hende lo keda toka, animá i bendishona ku e kantika nobo aki.  Shamiro ta gradisi Dios na prome luga pa sigui yud’é logra su meta kual ta impakta tur hende ku skucha su musika ku mensahenan positivo foral ku e palabra di Dios. Shamiro ta sumamente agradesi tambe na tur hende ku a yud’e i ta sigui sostene.

Ta trata aki di un kantika inspirativo ku un dushi melodia estilo Classical Pop / Balada. Pueblo por solisitá e kantika nobo na tur radio na Korsòu, Aruba, Bonaire i Hulanda. Tambe por skucha e kantika nobo aki riba soundcloud https://soundcloud.com/shamiro-anita/hala-un-rosea of bishita shamiro su página ofisial, www.shamiromusic.com, kaminda bo por skucha e kantika i tambe kumpr’e. Por kumpra e kantika tambe riba iTunes, Amazon, Spotify i Pandora.

Esaki ta e prome kantika di Shamiro su album nobo ku lo sali e aña aki. Pa mas informashon tokante di esaki bishita Shamiro su Facebook Page: www.facebook.com/shamiromusic.