Djadumingu awor 5 di Novèmber na Plasa Wilhelmina

Grupo nan di Gaita i Aguinaldo ta den full preparashon pa e tremendo Apertura di Temporada ofishal djadumingu awor 5 novèmber 2017 na Plasa Wilhèlmina.
Kas di Kultura ta invitá bo na e tremendo evento aki unda grupo nan di Gaita i Aguinaldo lo duna tur ku tin pa eksponé nan músika i baile manera nos a kustumbrá kuné.
Nuebe grupo di Gaita i Aguinaldo lo presentá  riba Plasa Wilhèlmina den kual dos ta den nan aña di selebrashon. Grupo Los Cariñitos komo un di esnan ku ta selebrando próksimamente 30 aña di eksistensha i tambe Los Paranderos ku ta selebrando 10 aña di eksistensha lo ta esnan ku lo tira un lus riba nan pa e evento aki.
Pueblo di Kòrsou ta keda kordialmente invitá pa bin habri e temporada dushi di fin di aña i kuminsá sinti e ambiente di Gaita i Aguinaldo for di 5or di atardi na Plasa Wilhèlmina.
Kas di Kultura ta invitá bo.