Pronto Kòrsou lo tin su di 8 restorant KFC i su di 5 Pizza Hut

Sèptèmber, 2017 – WILLEMSTAD:  E restorantnan di mas stimá riba nos isla ta ‘na kaminda pa Bándabou’! Masha tempu pueblo di bándabou ta anhelá nan propio KFC i Pizza Hut, esaki di akuerdo ku representante di HUCOR Co. Holding NV, sr. Randy Maurera. “Nos ta hasiendo tur trámite ku ta nesesario pa pronto nos kuminsá ku trabounan di konstrukshon. Esaki lo nifiká empleo pa habitantenan di bándabou; no únikamente den e fase di konstrukshon pero tambe despues ora di reklutá koleganan nobo pa KFC i Pizza Hut”, asina Randy Maurera a kontinuá bisando.

KFC, lo tin su ‘Drive Thru’ i Pizza Hut lo ta estilo di ‘Express’ ku entrega te na kas. Tur dos restorant lo kompartí un patio den airu liber ku parasòl na unda ku famianan por sinta kómodamente disfrutá di nan tempu huntu i kome nan faboritonan di KFC i Pizza Hut. E restorantnan lo haña un ubikashon stratégiko nèt na entrada di bario di Tera Kòrá, riba un tereno de Bon Bini Real  Estate N.V. ku tambe pertenesé na  grupo di Hucor Holding N.V. Awòki, Pizza St. Maria ta entregá te na Tera Kòrá, próksimamente e restorant di Tera Kòrá mes lo kubri e área te na Barber. Ku konstrukshon di e restorantnan na Tera Kòrá, HUCOR Co. Holding NV ta duna Kòrsou su di 8 restorant KFC i su di 5 Pizza Hut.  E preparashon ya a kuminsá i por wòrdu realisá den aña 2018.