Konstrukshon lo ta klá den algun siman

Willemstad- Mart: Pronto lo hasi re-apertura di e restorant di KFC den Sta. Maria. Klientenan di e aria di Sta. Maria i Bándabou sigur a sinti falta di nan KFC. E restorant na Sta. Maria lo tin e mesun diseño interior ku esun resien renobá na Saliña, miéntras ku parti pafó si lo ta diferente. E asina yamá ‘In Store Prepared Concept’ (ISP) ku ta nifiká, tur dia fresku prepará, ta bin bèk den e konsepto total di e restorant ku lo ta kompletamente nobo i inovativo. “E ‘look’ moderno di e restorant lo desviá e kliente su pensamentu for di e kolónan tradishonal di KFC. Den e diseño aki a usa lèternan un poko mas intuitivo pa hóbennan, hopi koló blou skur i konsiderablemente ménos di e koló bèzj- tur esaki pa añadí na e ‘look’ nobo di KFC”, esaki di akuerdo ku Christal de Lanooi enkargá ku Development & Design pa restorantnan KFC na Kòrsou.                                                                                                                                                                                                                                                                                                        Den lòbi di e restorant a traha ku hopi glas, di manera ku klientenan por mira pafó i visevèrsa.  E ‘dining room’ lo ta hopi variá, tantu den tamaño i estilo. Lo tin krùk haltu i un aria spesial pa hóbennan i tambe ‘booth seating’ pa famia. Por último a inkluí mesanan lòs i stulnan ku fásilmente por wòrdu move pa ora gruponan grandi bishitá e restorant.

Durante di e rekonstrukshon a probechá pa mehorá algun detaye manera e.o maneho di awa. Aki por hasi menshon ku tur awa prosedente di èrko lo kai den un tanki i esaki riba su turno lo wòrdu usá pa plantashon. Esmas, rònt di e restorant a planta ku matanan ku ta ménos sensitivo na kuido i nos klima. A tene kuenta ku medioambiente tambe. Por ehèmpel, e dak a keda kubrí ku material TPO i tur loke ta pintura na e restorant a keda hasi ku fèrf pro-medioambiente ku base di awa. Henter e establesimentu tin iluminashon LED, aki ta inkluí tur logo di KFC.  E bòrchinan di menú awor lo ta digital, loke tambe ta duna un bista masha moderno. Bibando den klima tropikal, a tene kuenta ku solo dor di instalá ‘lamèl’ pafó na e partinan ku tin mas penetrashon di solo durante di oranan di mèrdia. Aki ta spar tambe riba gastunan di elektrisidat dor di krea un temperatura mas agradabel paden di e restorant.