Tur tres restorant ta kla pa Bai’e! … Establesimentunan di Diamond’s tambe ta djòin…

WILLEMSTAD: Tur tres kadena di restorant lo partisipá un biaha mas den e temporada nobo di e game show Bai’e vershon 2017-2018 na TeleCuraçao kanal 8. E game show ta konta ku un gran sintonia i klientenan di tantu KFC, Subway i Pizza Hut ta entusiasmá pa nan gana sea plaka kèsh òf e outo. Aktivamente nan ta kumpra i depositá nan resibu den e buzon i ansioso ta warda riba e sorteo pa mira si nan tambe por Bai’e. Randy Maurera di HUCOR Holding N.V. ta konfirmá un otro tremendo temporada ku e game show i na mes momentu ta anunsiá ku e temporada aki, ámbos establesimentu di Diamond’s tambe lo bai partisipá.

Manera semper, na kompra di 15 florin òf mas, tur hende por partisipá kumprando sea na KFC, Subway, Pizza Hut i awor na Diamond’s Party & Novelties Supplies i tambe na Diamond’s Home, Crafts & Hobby, ambos na Zeelandia. Klientenan mester bòltu nan resibu i yena tur dato patras di dje i tir’é den e buzonnan ku tin den kada restorant òf establesimentu di Diamond’s.  Di akuerdo ku sr. Hugo Lew yen Tai, direktor di TeleCuraçao, e promé edishon di e game show lo bai den laira na luna di Mei 2017.  Ta konosí ku klientenan di restorantnan KFC, Subway i Pizza Hut tin masha suerte, i a yega di gana e outo kumprando na Subway, Pizza Hut i tambe KFC!  Randy Maurera di HUCOR Holding N.V. ta finalisá bisando, “For di aworakí nos ta deseá tur kliente, hopi éksito i ta spera ku e suerte por toka nos klientenan pa e temporada nobo aki di BAI’E”.