WILLEMSTAD – Swim Club Bulado resien a tene un enkuentro sosial riba e barku Freewinds ku su miembronan i nan mayornan pa duna rekonosementu na e atletanan miembro di Buladó ku a sobresalí ku nan prestashonnan durante aña 2016. Buladó Swim Club tur aña ta tene e enkuentro di premiashon aki pa stimulá nan miembronan pa nan sigui buska ekselensia den nan preparashon i kompetensianan. Riba e anochi di premiashon ta duna duna rekonosementu di apresio na vários persona i organisashon ku den transkurso di aña(nan) a kontribuí di un forma spesial ku e klup di landamentu kompetitivo. E aña atrobe esei tabata e kaso i a pone vários di e personanan aki den spòtlait den e sala di evento riba Freewinds.
E atletanan i mayornan presente tabatin un anochi hopi plasentero y Buladó ta gradisí staf i personal di Freewinds pa a risibí e klup riba e luhoso barku krusero aki den nos bunita bahia.
Kapitan di Freewinds na final a tene un diskurso den kua el a informá kon importante deporte tabata den su formashon i esun di su yunan. Mas aleu el a stimulá e hóbennan presente pa sigui hasi nan máksimo esfuerso pa ekselentá den e ramo di deporte ku nan a skohe p’e.
E atletanan ku a sobresalí den 2016 i a risibí rekonosementu spesial riba e anochi tabata:
Shaquantaly Bomberg ku a risibí Sambil Seahorse Award, Vince Treurniet a risibí e RBC Award i alabes Monique Maria Award. Vince a Sali premiá komo mihó landadó ( best swimmer), Siechnar Djaoen Award a bai pa Saedy Martina, mientras ku David Emmers a gana Pescado Volador Award. Shade Vermeullen a risibí Hilton Woods Award i Kini-Kini Award a bai pa Ri-jhona Pedro i Tyresse – Petrona. Diferente otro atleta tambe a risibí un rekonosementu.
Sr. Sharier Doran, miembro di maneho di RBC Royal Bank tambe a dirigí algun palabra na e hóbennan den representashon di e banko ku ta spònser principal di Buladó. Direkiva i tur e atletanan a yama un palabra di danki special na e coach-nan; Antonio Nunes ,Sharmilo Leticia i Sharonica Mercilia pa nan dedikashon i bon trabou.
Direktiva ta gradisí mayornan pa nan kontribushon pa e muchanan por a yega trainingnan i partisipá na kompetensia tantu lokal, komo internashonal. Buladó Swim Club ta na kaminda pa selebrá su di 44 aña di eksistensia i ta risibí muchanan for di 5 aña pa bira miembro di Buladó i hasi un ramo di deporte eksitante i di un balor grandi den formashon di hóbennan. Pa mas informashon bishitá www.bulado.net i e página riba Facebook di Buladó Swim Club.