Willemstad – Ministerio Públiko (OM) i Curaçao Airport Partners (CAP) ta bai traha direktamente huntu pa realisá e asina yamá ‘background check’ mas efisiente pa trahadornan di èrport di Kòrsou. Te awe lokèt di pèrmit di Kòrsou (‘Vergunningenloket Curaçao’) tabata parti di e kadena meimei. Ku e kombenio e investigashon seif i metikuloso lo keda garantisá miéntras ku e prosedura lo keda hasi mas kòrtiku konsiderablemente. E kombenio a keda firmá djaluna 29 di ougùstùs 2016 entre Prokurador-general (PG) Guus Schram di Ministerio Públiko (OM) i CEO di Curaçao Airport Partners (CAP), Ralph Blanchard. E kombenio entre ámbos partido ta garantisá un investigashon di antesedente, un asina yamá ‘background check’, pa personanan ku ta traha (temporal) na Curaçao International Airport. E ‘background check’ ta un parti esensial di téknika i método pa garantisá seguridat na airopuerto i ta tambe un eksigensia di International Civil Aviation Organization (ICAO), e outoridat di aviashon di Nashonnan Uni ku ta enkargá ku proseso i maneho pa un sektor di aviashon sigur, efisiente, metikuloso, ekonómikamente i ekologikamente duradero. Sin un papel di bon kondukta, un asina yamá ‘Verklaring Omtrent het Gedrag’ un persona no por traha na èrport. Anteriormente personanan ku kier a traha na un kompania di aviashon, groundhandler òf tienda, mes mester a apliká pa e ‘Bewijs van Goedgedrag’ na lokèt di pèrmit di Kòrsou. E organisashon aki na su turno tabata pidi informashon serka OM. Pa un proseso mas efisiente por hasi e petishon awor direktamente via di CAP na OM. Esei solamente si e persona en kuestion bai di akuerdo k esaki. Parket di PG ta kontrolá e informashon hurídiko di e persona en kuestion. CAP lo haña konseho di OM si tin ‘Bezwaar’ òf ‘Geen bezwaar’pa loke ta
trata e petishon. E informashon lo no keda komuniká na terser parti, miéntras ku ta protehá tur privasidat di e persona en kuestion. Ku e kambio den e prosedura e trahadornan por haña trabou mas lihé na e negoshinan i servisionan na èrport. Tambe ta pone ménos preshon riba e órgano di lokèt di pèrmit pa loke ta trata e petishonnan ku ta bin for di e sektor di aviashon. E prosedura lo keda evaluá despues di 6 luna.