Anthony Wever tambe lo ta na Kòrsou

WILLEMSTAD:- Tur kos ta kasi klá pa ‘King of the Caribbean’ (KOTC); e kompetensia di biar e aña aki ta selebrando su di 10 aniversario.  Ya ta konosí ku KOTC lo konta ku partisipantenan di Aruba, Boneiru, Sint Maarten, Trinidad & Tobago, Jamaica, Costa Rica , Venezuela, Hulanda i Kòrsou. Entre e profeshonalnan lokal ku lo partisipá por hasi menshon di Anthony Wever. E hóben lokal residensiá na Arnhem Hulanda, Anthony Wever a dediká gran parti di su bida na e deporte di biar. Títulonan ku e hóben aki a optené ta realmente impreshonante. Asina por hasi menshon ku Anthony a alkansá number 2 den Emmen Open 9 Ball na 2013, number 1 den Amsterdam Open 8 Ball na 2013, number 2 den Hilversum Open 8 Ball na 2011, promé den A Ranking 14.1 Ball na 2011 i promé lugá den Appeldoorn Open na 2011. Aki na Kòrsou Anthony a sali number 1 den kompetensia di 8-, 9- i 10 Ball na 2010 i 2011, miéntras ku na 2009 e la sali na promé lugá den kompetensia di 8-, 9- i 10 Ball den Antia Hulandes. Ademas di esaki Anthony a sali na promé lugá den kompetensia Pan-Amerikano di 9 Ball na Nicaragua (2008). Anthony Wever sigur ta un di e hungadónan di biar lokal ku ta konta ku un CV pisá di weganan hungá na e.o Aruba, Boneiru, Argentina, Guatemala, Nicaragua, Venezuela, Reno Nevada, Las Vegas, Luxemburgo i Kòrsou. Kòrsou i prinsipalmente amantenan di biar ta pendiente pa e kompetensia di ‘King of the Caribbean’. Banco di Caribe ta rekordá tur esnan ku ta deseá di presensiá e Ten Ball Classic ku esaki lo tuma lugá entre 29 di Òktober i 2 di Novèmber próksimo na Rio Lounge & Sportsbar.