Franklin Sluis “Ta ora pa benta di nos komersiantenan tambe modernisá

Willemstad- E kompra for di Merka pa e fin di aña aki atraves di e plataforma di kompra for di Merka di CPost esta Punto Mio ta pinta di kibra tur rekòrt di e añanan anterior.   E kantidat di kompra na Merka atraves di Punto Mio pa e aña aki ta kibrando tur rekòrt registrando un kantidat di 20% mas di pakete kompará ku 2014. PuntoMio ta e úniko plataforma ku ta ofresébu un forma di kumprá tax free na Merka i ku buelo diario. China2you.com, ku e aña aki a hasi su entrada komo plataforma pa bestèl for di China, ta pinta di bira e revelashon den kompra for di eksterior pa 2016. Por asumí ku e mes un desaroyo aki ta tumando lugá sigur den nos region. Ta pa e motibu aki CPost ta kere ku ta momentu ideal pa komersiantenan lokal subi e via di benta online atraves di righttothedoor.com. E plataforma aki ta brinda e komersiante un solushon integral pa brinda su servisio no únikamente na nos merkado pero tambe internashonalmente.

Gerente General di CPost Franklin Sluis ta bisa ” Nos ta masha agradesido di e forma ku komunidat a brasa Punto Mio. Ela bira un forma di kompra preferí pa un grupo grandi den nos komunidat. E aña aki mas ku nunka nos ta nota ku e servisio aki ta yena e nesesidat moderno di e hende. CPost ta keda buska formanan pa hasi tur lokual ta keda ofresé na produkto den mundu aksesibel i fásil pa alkansá pa nos pueblo.”

Punto Mio a konosé durante di e añanan 2013 -2014 ku CPost ta ofresé e servisio un kresementu stabil konforme e pronóstiko di CPost. Ta den e kuadro aki tambe CPost a traha riba introdukshon di China2you.com. Pronto Europe2you.com tambe lo subi merkado. Esakinan ta forma parti di e servisionan inovativo ku CPost ta ofresé komo parti di Kòrsou su desaroyo di un servisio postal inovativo i un organisashon postal duradero. CPost den introdukshon di su servisionan ta hasi uso e echo ku e ta forma parti di ret postal den mundu, su aliansa ku proevedonan di solushon inovativo partikular i ekspertisio di su profeshonalnan pa loke ta moveshon di karta i pakete. CPost kontinuamente tin orea pa kiko ta e demanda di e hende moderno ku ta biba den nos komunidat.

Ta den e mes un kuadro aki tambe CPost ta fasilitá komersiantenan lokal ku su servisio di righttothedoor.com. E plataforma aki ta ofresé komersiantenan lokal e posibilidat pa benta di nan produktonan atraves di e plataforma i entrega di esaki te den e porta di esun ku a bestèl e. Righttothedoor.com ta e solushon pa empresanan lokal amplia nan merkado e via di benta online na un forma fásil i alkansabel i alabes generá devisa pa Kòrsou.