Riba 4 di yanüari 2014 lo bai tin e maratòn di fitness, The Breakthrough Fitness Challenge, pa asina komunidat por habri aña ku un bon intenshon pa un bida saludabel den 2014. Lo tin 12 ora di moveshon parti den dos sekshon. E personan ku partisipa na e maraton kompletu tin oportunidat di gana premio. Heavy-sweat session di 6’or di mainta pa 12 ‘or di mèrdia ku 8 seshon di 45 minüt guia pa 8 instruktor  i  e Light-sweat session di 6’or di atardi pa 12’or di anochi kaminda e partisipantenan bou di muzik bibu lo praktiká diferente moveshon di kurpa pa asina mantené nan mes den forma. E gran evento aki ta tuma lugá den International School of Curacao. Meta di “The Breakthrough Fitness Challenge, Move Your Body for Fundashon Alton Paas” ta primeramente pa uni komunidat masalmente den un aktividat di moveshon. Na di dos lugá e aktividat aki ta pa yuda rekoudá fondo pa kubri gastunan di proyektonan di Fundashon Alton Paas pa personanan ku Dwarslesi. Informashon kiko kada workout ta para pe. ESSENTRICS ta original, pero ta basa riba Tai Chi ku kombinashon di e teoría di ballet pa krea un kurpa sano, relaha i saludabel. E base ta ehersisionan di  kombinashon dinamiko di forsa i fleksibilidat ku hopi stretchmentu di muskulonan. E ta traha ku e muskulonan pa relaha nan. BOOGIE BOX FITNESS ta un sistema di cardio kombina ku Marshall Arts, Hip Hop, Latin flavour, Muscle resistance, loke abo ta hinka den bo ta saka’fo. Ehersisio kompletamente riba koreografia i musika. Research a mustra ku bo por kima 1100 kaloria den un seshon di 45 pa 50 minüt. TOTAL FITNESS ta un workout pa e kurpa kompletu. Ta moveshon dirihi riba peso di kurpa.  Speshal pa traha riba muskulo, no muskulo diki, tambe cardio, muskulonan di barika, chanchan i pianan. ZUMBA ta un rutina di fitness basa riba ritmonan di baile manera merengue, salsa, reaggeton i pop. Den un les tur hende ta baila, soda i gosa. Tur nivel ta welcome! Ideal pa baha peso! BOOTHCAMP ta un tipo di programa pa treining fisiko den grupo. E ta kuminsa ku strech i korementu, sigui pa un variedat di rutina ku por ta hisa obheto, pushups, kore di un punta pa otro, ets. E ta kaba ku un tipo di Yoga streching. Boothcamp ta wordu usa pa kima vèt i subi efisensia kardiovascular. CIRCUIT WORKOUT ta un programa di fitness kaminda ta traha riba kondishon di e kurpa pa keda salu. E ehersisionan ta wordu hasi den un sirkulo ku diferente stashon i kada ehersisio ta dura 1 minut larga. Despues di 1 minut ta kambia pa e otro punto den e sirkulo pa sigui ku e otro ehersisio durante 1 minut. E ehersisionan ta konsentra riba cardio i tambe forsa. CROSSFIT ta un programa di forsa i kondishon ku e meta pa drecha bo forsa di muskulo, resistensia kardio-respirativo i fleksibilidat. E ta konsentra riba ehersisionan aerobics, ehersisionan di peso korporal, hisamentu di peso olimpiko, ets. ku ta moveshonnan varia riba un intensidat haltu ku e meta pa drecha bo kondishon. PILATES ta un programa di ehersisio ku a wordu krea pa yuda personanan ku leshon na wesu di lomba, osteporosio, scoliosis, ets. Banda di esei e ta tambe un bon forma di ehersisio pa traha riba bo muskulonan interno ku ta karga bo wesu lomba, nir, pulmón. E ta yuda tambe bo postura. Tur hende mester invertí den nan propio salú pa alkansá un mihó kalidat di bida. Esaki ta konta tambe pa personanan desabilitá. Moveshon i ehersisio no solamente ta yuda den e proseso pa aselerá e tempu di rekuperashon, pero e ta mantené tambe e kurpa saludabel. Via di e aktividat aki “Fundashon Alton Paas” ta purba di animá i konsientisá komunidat pa ta mas aktivo, alabes pa kontribuí ku e fundashon di moda ku nan tambe por yuda otro personanan ku Dwarslesie, pa nan tambe por alsa nan kalidat di bida. Korsou ban move! Karchi pa e evento ta optenibel na Yankee Donuts Cafe Saliña i Sta. Maria, 4th July Barber, Fundashon Alton Paas. Pa mas informashon por e-mail na info@fundashonaltonpaas.org òf yama telefòn 736-3577, 5100767 òf 512-5902.