Diasabra Koningin Wilhelmina Fonds Aruba a tene nan di dos charla den cuadro di e campaña di concientisacion ‘Ban Preveni Cancer Hunto’. Diferente orador a bin na palabra unda a enfoca riba e tres puntonan primordial pa preveni cancer: come saludabel, moveshon regular y un peso saludabel.

Rene Wild a duna un presentacion hopi interesante den cual el a motiva esnan presente pa cambia pa un forma di bida mas saludabel enfocando riba salud na tur edad. Hoben of di edad, tur hende por cuminsa haci mas moveshon y come saludabel. Ta e determinacion mester ta presente. Saskia Budel kende ta un gewichtsconsulente, a splica con pa haci e cambio pa un forma di come cu lo beneficia nos salud. Dr Sandy Roga kende ta un chiropractor a splica kiko stress ta haci cu bo curpa. Stress por ponebo sinti tur sorto di dolor y asta aumenta di peso y p’esey ta importante pa nos tur trata na hiba un bida mas trankilo sin cunsumi cu otro hende. Bo salud ta na prome lugar.

Solange Tchong ta vocero di AZV y el a duna un splicacion riba con e fondo aki ta hinca den otro y kiko tur nos ta haya di AZV. Pa e parti di pregunta sr Reuben Tjon Sie Fat kende ta un medisch adviseur di AZV tabata presente pa asina splica mas profundo con e sistema di AZV ta funciona y contesta preguntanan specifico di e publico presente. Bojoura Cos Richards a tene un presentacion riba tur e servicionan cu Koningin Wilhelmina Fonds Aruba ta ofrece comunidad y en particular e pashentnan di cancer y nan famia.

Por ultimo sra Soila Vries a bin na palabra y den un testimonio hopi profundo el a conta su experiencia cu cancer y con el a sobrebibi esaki apesar cu tur specialista a bis’e cu ta laat. Dokternan ta specialisa y por yudabo cu nan experticio pero e man di Dios ta keda e factor determinante den e proceso di recuperacion y sra Soila Vries ta e ehempel palpabel di esaki unda cu apesar cu dokternan a diagnostik’e cu un cancer maligno y cu lo por a lag’e den rolstoel, su fe den Dios y cu e sosten di sernan keri, awe e ta liber di cancer y canando rond. Dokternan mes a keda sorprendi di su recuperacion. Un storia cu a inspira y encurasha hopi di esnan presente.

E proximo charla di Koningin Wilhelmina Fonds Aruba lo ta diasabra dia 24 di oktober di 9or di mainta te cu 12or di merdia. Pa mas informacion por pasa na nos Centro di Informacion na Spinozastraat 9 of yama durante oranan di oficina na 5820412. Pa mas informacion por bai tambe na nos Facebook Koningin Wilhelmina Fonds Aruba of nos website www.koninginwilhelminafonds.com