Un bon notisia sigur…

WILLEMSTAD.- Ayera e tim organisashon di e konsierto benéfiko “I Celebrate You” a hasi entrega di un suma di 17 mil florin na New Song College.

Pastor Welton ‘Papi’ Esprit a kuminsá bisando ku e ta sumamente kontentu i gradesido ku e reakshon positivo di komunidat. E show ku a konta ku e kantantenan, Elijah Oyelade di Nigeria, Michael Paniagua di Ecuador, Raigny di Ulanda, Ernest ‘Keke’ Willems, Æmy i grupo Berachah di Kòrsou tabata un éksito rotundo mirando no únikamente kuantu hende tabatin pero e kalidat haltu di e konsierto.

Sra. Dinaira Jackson ku ta enkargá ku e parti finansiero a duna un bon notisia na momento ku el a splika ku e skol a risibí 45 mil florin di seguro, yudansa finansiero di Curoil i MCB, anto e 17 mil florin rekoudá di e konsierto.

Mirando e pèrdida di skol i e gastunan pa reforsá e seguridat di e skol a suma mas ku 60 mil florin, pues e konsierto sigur a hunga un ròl determinante pa alkansá e  montante ku tabatin mester.

Tantu e dosentenan i alumnonan di New Song College ta sumamente gradesido asina e  direktor di New Song College, Sr. Derrel Bruno a indiká.