Di dos konsierto Di Ronald McDonald House Charities lo tuma lugá djamars 4 di Ougùstùs proximo!

Willemstad – Diamars tin un oportunidat pa pasa un anochi plasentero i al mismo tiempo kontribui na e trabou valioso ku ta wordu hasi pa nos muchanan i nan famia ku ta na SEHOS.

Ronald McDonald House Charities (RMHC) Curaçao Foundation den koperashon ku  Cross Over Youth Movement Foundation i Freewinds Band ta bai tin nan di dos konsierto di mucha pa mucha. E konsierto ta konta ku partisipashon di kantante nan i talento yòn manera Elena Meijer – Titania Willems- Evan Huerta- – Sensi Rondon – Nedrah Barbara – Denice Coco – Celine Janssen – Kristina Ros – Sarah Mattews – Jada van Dijk – Roxy Rozal – Micheal Ridderstadt i Veronica Pichardo.

Tambe lo tin partisipashon di dos ‘Special Guest Stars’. E banda Unlocked ku ta konsistí di talènt yòn lokal i tambe un akto spesial di Isabel da Sila y Danielle Metry ku lo sòru pa un ambiente total riba bordo di Freewinds. E konsierto lo konta tambe ku partisipashon di Ronald McDonald. Pa reserva karchi por bèl na : 5102999 òf 5613039 Porta di Freewinds lo habri 7.30 pm, riba djamars 4 di Ougùstùs pa un tremendo konsierto pa nos muchanan.

Informashon RMHC sekshon lokal:

For di su establesementu aki na Kòrsou RMHC a sòru pa identifiká, desaroyá i traha riba proyektonan ku ta apoyá programanan ku ta direktamente konektá ku salu hubenil riba tèrmino largu. E Ronald McDonald Family Room, ku ta e promé programa di RMHC Kòrsou ta ofresé un área di rekreashon mas konfortabel na muchanan interná den hospital y tambe ta brinda mayornan i famianan di muchanan aki un kamber konfortabel pa hospedá den dje. Desde su apertura RMHC Curacao Foundation a sostené mas ku 5900 famia den tempu difísil.