Willemstad –   E konsierto & Show titula “Nunka Entrega” di Shamiro Anita, ku a tuma luga djasabra ultimo, den International School tabata espektakular. Un sala  yena por kompletu surpasando tur ekspektativa. Hopi ta esnan ku a presensia e evenementu aki ku ketu bai ta komenta kon nan a disfruta i sinti nan bendishona. Por bisa ku e meta di Shamiro a ser kumpli. Dios ta duna forsa pa “Nunka Entrega”

E gruponan Adonai, Danzando A Sus Pies, Namae-Last, Excel Arts Academy i Kor Gods Angels i IGA Mass Choir a kompaña Shamiro riba e scenario ku shownan espektakular. Artistanan invita di Kòrsòu Angelique Klooster i Eliazar el Mensajero, Jessie Cuevas for di Sto. Domingo i for di Venezuela Rosana Casares tambe a duna tremendo presentashon riba e senario kantando na miho hitnan. E artistanan Sharely Beaumont, Will Jacobus, Braidley Jourdain huntu ku Shamiro e artistanan invita a forma un team di 8 kantante den un potpuri ku e kantikanan gospel mas konosi I gusta. Tur esakinan huntu a pone tur esnan presente kanta i alaba Dios den un ambiente hopi dushi yena ku hopi Bendishon.

Shamiro ta gradisi Dios na prome luga. E ta yama danki di kurason i manda bendishon pa tur ku a kopera di un forma of otro i tambe na tur ku a bin e konsierto. Meskos e ta manda hopi gradisimentu i un bendishon grandi na tur medionan di komunikashon ku a yud’e i tambe na tur su sponsornan. Hopi ta esnan ku a sali hopi kontentu, diferente I bendishona for di e konsierto aki. Masha Danki Korsou.