WILLEMSTAD – Konforme kontrato i skema di tempu e kontratista CORE a entregá e promé fase di e proyekto grandi di Sambil Curaçao na Veeris. Nada no por stroba e hürdónan mas pa areglá nan mes negoshi pa e apertura di dia 28 di mei awor i pa kua e rekonteo ya a kuminsá. Den fin di siman e kompania CORE simbólikamente a entregá Gerente General Jonathan Cohen di Sambil Curaçao e yabinan pa e sentro inmenso di kompra i e sitio pa dibertishon. Señor Cohen a duna e kompania di kontratista un kòmplimènt pa e resultadonan ekselente i un proyekto di konstrukshon ku ta bal la pena. Den e proyekto mas resien aki di famia Cohen a bolbe apliká vários inovashon ku pa e kontratista tambe ta nobo i hustamente p’esei e no ta dje fásil ei pa apliká. Tuma e konstrukshon di e dak kaminda a apliká material i téknika nobo ku e meta pa laga e lus di dia drenta pero pa tene e kalor pafó, miéntras paden e ta aire kondishoná. Ora a tèst e sistema di èrko, a resultá ku nan a registrá apsolutamente nada di vibrashon na e chiller-nan, loke ta mas ku djis un indikashon di kon presis tur e elementonan ta komplementá otro. Pa esei so kaba CORE a demostrá ku nan a desplegá un tremendo trabou. Tin naturalmente tambe e eksigensianan masha spesífiko pa konstrukshon di e sala XD pa pelíkula di Cinemark, un eksperensia pa wak sine kompletamente nobo pa e área di Karibe i pues tambe na Kòrsou. E promé fase ta trata di mas òf ménos tres kuart di e edifisio remarkabel i grandi na Veeris. E parti ei awor ta kompletamente kla pa uso. Di e di dos parti, esun ku ta tira pabou, tambe CORE a finalisá den su forma rudimentario. Ta ora un hürdó grandi firma pa tuma e parti ei i ora nan eksigensianan enfátiko ta konosí, CORE lo akabá e parti ei pa e di dos fase. Mientrastantu riba website i den medionan di komunikashon Sambil Curaçao a kuminsá konta e dianan ku falta pa e dia grandi yega ku e portanan di e negoshi, establesimentu di komementu i e otro fasilidatnan den e sentro di kompra aki habri pa e públiko general. Den fin di siman e promé hürdó a informá Sambil Curaçao ku nan ta kompletamente kla pa risibí nan promé klientenan. Awor un tras di otro lo bai mèldu ku nan tambe ta kla.