Willemstad – Siman pasá Kooyman a instalá su propio Raad van Kinderen (Hunta di Mucha) kual ta konsistí di alumnonan di brùgklas di Gouverneur Laufferschool. E muchanan aki lo bai yuda Kooyman ku e dilema ‘kiko Kooyman tin ku hasi pa den futuro nan ta indispensabel pa Kòrsou ‘. E proyekto speshal aki a kuminsá ku un seshon informativo na skol i a sigui ku un rekorido amplio na Kooyman Megastore. Ku tur e informashonnan ku nan a risibí, e próksimo 6-8 simannan e muchanan lo bai traha riba dje pa resolvé e dilema aki.
Raad van Kinderen ta un inisiativa di The Missing Chapter den koperashon ku Unicef ku e meta pa enkurashá muchanan pa di un forma struktural pensa huntu ku kompanianan i organisashonnan riba diskushonnan stratégiko i soshal ku tuma lugá den nos sosiedat. “Nos di Kooyman ta brasa e inisiativa aki pasobra di un banda e ta brinda nos hóbennan e oportunidat pa pensa riba temanan aktual den mundu di negoshi. Esaki ta komplementá di un manera maravioso nan konosementu teorétiko ku nan ta haña na skol. Di e otro banda pa nos tambe e ta un oportunidat pa nos organisashon ku nos no por laga pasa sin mas, debí ku muchanan ta mira i analisá situashonnan for di un punto di bista diferente i habrí ku por hiba nos na puntonan di bista kompletamente otro for di nos manera di pensa. Ademas e hubentut di awe ta nos klientenan di futuro i gustosamente nos ta envolví nan den nos toma di desishonnan”, segun sr. Herbert van der Woude, CEO di Kooyman.
Raad van Kinderen ta aktivo for di 2015 na Kòrsou. “Saliendo for di e punto di bista ku e balor di pensamentu di muchanan ta di gran importansia pa nos komunidat, nos a introdusí e inisiativa aki tambe na Kòrsou”, Tamara Salsbach di SIFMA (representante di Raad van Kinderen Kòrsou) ta konta. “Nos ta sumamente kontentu ku Kooyman a mara su mes na e inisiativa aki i nos ta konvensí ku e muchanan lo bini ku ideanan hopi balioso.”
Gouverneur Laufferschool ta permití su alumnonan bou di ora di skol, dediká tempu pa resolvé e dilema aki durante sierto lèsnan i un grupo di dosente ta guia e proseso. ”E ta un reto eksitante pa tantu e mucha komo Kooyman i ami ta ansioso pa mira e presentashonnan di nan resultadonan”, asina sr. Herbert van der Woude ta konkluí bisando.