KRALENDIJK – MEI 2014: Durante un enkuentro festivo, Kooyman a pone e promé piedra dia 23 di Mei último pa asina duna inísio ofisialmente na e konstrukshon di e Megastore kual lo ta ubiká na Kaya Korona Boneiru. E preparashonnan pa ku e konstrukshon di e Megastore a kuminsá na inísio di 2013 I riba 20 di Juni 2013 a risibí e permít di konstrukson pa e promé fase, esaki, danki na e bon kolaborashon di Bestuurscollege, DROB i brandweer. E konstrukshon lo ta den gran parti, den man di kompanianan lokal i lo kana den fase pa asina sigi asistí e klientenan bon durante e proseso aki. Expektativanan ta pa e projekto wórdu kompletá na mitar di 2015. ‘Kumpli ku deseo di nos klientenan’ Den e último añanan, e kantidad di kliente a krese kontinuamente. ‘Pa por asistí nos klientenan mihó posibel, amplia nos surtido i implementá inovashon, ta importante pa nos expandé. I nos edifisio existente ta limitá nos den nos ambishon di krese’, esaki según Sr. Herbert van der Woude, CEO di Kooyman. ‘Nos a mira otro lokalidad, pero nos a opta pa konstruí un tienda kompletamente nobo riba e lokalidad aktual. Esaki tabata posibel komo ku nos a logra amplia e tereno ku kompra di e tereno pegá na esun existente. ‘Konsepto inovativo na Boneiru’ E edifisio nobo tin un superfísie di aproximádamente 16.000 m2 debidamente denominá komo un Megastore. E parti di tienda ta 2.500 m2 kual ta 3 biaha e tamaño di e tienda aktual. E kapasidad di depósito ta wórdu expandé I lo krea un total di 77 parkeerplaats. Nobo na Boneiru lo ta e Drive Thru será di 2300 m2. E konsepto aki a wórdu introdusí pa Kooyman pa promé biaha na 2002 na Korsou I a prueba di ta un éxito kompleto komo ku esaki ta un manera sumamente efisiente di kumpra material di konstrukshon. ‘Otro gran benefisio ta ku nos por warda e materialnan den un área será kual ta mantené e kalidad di e produktonan I ademas nos ta ofresé nos empleadonan un ambiente mas ameno pa laborá. Nos ta ansioso pa trese e konsepto aki na Boneiru’, Sr. Herbert van der Woude ta sigi splika. ‘Konfiansa den ekonomía’ E konstrukshon di Kooyman Megastore ta duna un impulso positívo na e ekonomía di Boneiru. E kantidad di kúpo di trabou lo ser ampliá ku 20 empleado pa asina por manehá adekuadamente un tienda di e tamaño aki. Ademas, e jegada di e Drive Thru ta hasi posibel pa e kontratista por hasi su kompras mas lihé kual lo halsa su produktividad. Esaki sigur ta algu importante pa por entregá projektonan na tempu I según e budget. Ku Kooyman ta invertí den e expanshon aki ta un indikashon ku e kompanía tin tur konfiansa den e futúro di Boneiru riba término largu, I di e manera aki kier duna su aporte. E invershón total repartí entre 2014 I 2015 ta di aproximádamente 7 mión Dollar. ‘Tokante Kooyman’ Kooyman ta aktivo for di añanan 50 di e síglo anterior riba Boneiru ku distribushon di material di konstrukshon. Na 1982 esaki a kuminsá, huntu ku 3 otro partner, un kompanía jamá General Store Bonaire na e lokalidad aktual na Kaya Korona. E akshonnan di GSB a wórdu kumprá i GSB a pasa pa forma parti di e organisashon di Kooyman. Na 2001 e nómber a kambia di GSB pa Kooyman Boneiru. Kooyman tin 6 establesimentu repartí entre Aruba, Boneiru, Korsou I St. Maarten kaminda un total di 500 empleado ta laborá. Na Kooyman Boneiru tin 35 persona ta laborá.