WILLEMSTAD- 27 di febrüari 2014:- E aña aki ta marka e di 33 edishon di ‘Vitrina Turistica ANATO’. Ya ta pa algun aña kaba ku Kòrsou ta forma parti di e feria aki na unda ta trese e mundu di turismo huntu pa durante di 3 dia intensivo eksponé, kòmbersá i deliberá riba e tendensianan nobo di e industria turístiko. E delegashon di  Kòrsou representá pa Ofisina di Turismo di Kòrsou (CTB) i partnernan den sektor priva un biaha mas ta presente na e evento ku ta tuma lugá na Bogota, Colombia. E aña aki e feria ta konta ku un partisipashon di mas ku 33.678 persona. For di dia 26 te ku 28 di febrüari,  Kòrsou lo probechá di un tremendo oportunidat pa ekshibí Kòrsou di un manera úniko. E aña aki a pone enfoke riba interakshon ku e bishitantenan di e feria. Un total di 788 empresa for di 29 pais  lo partisipá e aña aki pa eksponé nan produkto òf servisio. Ademas lo tin 311 media di komunikashon i 595 periodista for di diferente pais ku ta partisipá i brinda kobertura na ‘Vitrina Turistica ANATO 2014’. ANATO organisá pa ‘Asociación Colombiana de Agencias de Viajes y Turismo’ ta un di e ferianan internashonal di turismo di mas grandi na Colombia i den su kategoria un di e tres eventonan di mas grandi den Sur Amérika. Kòrsou su partisipashon na ANATO ta unu altamente apresiá dor di e organisashon mirando ku nos pais tabata e pais di honor  na 2011. E aña aki a dediká ANATO 2014 na Repúblika Dominikana. Durante di ‘Vitrina Turistica ANATO’ organisadó di kongreso i konferensiá profeshonal, operadó  di turismo vakashonal, agensianan di biahe i aerolineanan ta topa ku otro den un setting ku por kondusí na relashonnan masha produktivo pa e pais òf empresa. E delegashon di Kòrsou ta konsistí di representantenan di CTB, CHATA, Acoya Curaçao,  Curaçao Marriott Beach Resort & Emerald Casino, Fiesta Tours, Hilton Curaçao, Insel Air,  Livingstone Jan Thiel Resort,  Renaissance Curaçao Resort & Casino, Rumba Tours,  Santa Barbara Beach & Golf Resort Curaçao,  Sunscape Curaçao Resort i Trupial Inn Hotel & Casino. CTB huntu ku e diferente  partnernan den turismo  ta sumamente satisfecho ku e atenshon pa Kòrsou durante ANATO 2014. Pa mas informashon tokante ANATO 2014 por bishitá e página wèp; http://www.vitrinaturistica.info