…CTB ta felisitá Caribe Media Productions…

WILLEMSTAD- 31 di mart 2014:- Caribe Media Productions establesé na Kòrsou resientemente a risibí un rekonosementu internashonal pa produkshon di propagandanan lokal. Ta trata aki di ‘American Advertising Awards’ mihó konosí komo ADDY Awards. Esaki ta promé biaha ku Kòrsou a partisipá den e kompetensia aki. ADDY Awards ta keda presentá dor di e federashon Caribbean Advertising Federation (CAF) ku ta host e kompetensia di mas prestigioso den e industria di publisidat rekonosiendo kreatividat ekselente den propaganda. For di un total di 769 inskripshon regional Caribe Media Productions a sá di bai kas ku un total di tres ADDY Awards di plata. E anunsio di e premiashon di Caribe Media Productions resientemente a wòrdu hasí dor di presidente di CAF, sr. Renae Quinton. E premionan otorgá na Caribe Media Productions a bai pa dos propaganda di televishon sumamente popular kual ta, Freeport Jewelers 40th Anniversary (ku a gana plata pa e mihó propaganda na televishon) i Baby Tutu’s Goisco Cornflakes (ku a gana plata pa e mihó propaganda na televishon i mihó animashon i efekto spesial) Mester apuntá ku e propaganda aki ta den nos dushi idioma papiamentu akompaña pa nos ritmo di Seú . Ta promé bes ku Kòrsou ta wòrdu rekonosé den American Advertising Awards i ta promé bes ku Kòrsou ta gana un premio ADDY. Kòrsou tabata den kompetensia huntu ku Barbados, Jamaica, Trinidad & Tobago, Belize, Grand Cayman i St. Lucia. E logro aki sigur ta grandioso pa Kòrsou, e ta indiká e kalidat i kreatividat den produkshon ku ta wòrdu produsí lokalmente i balorá internashonalmente. Tur ganadó di un ADDY di plata inkluyendo Caribe Media Productions lo kompetí kontra otro ganadónan di 4th District kual den e kaso aki ta US Virgin Islands, Virginia i Florida. Finalmente ganadónan di e 4th District lo kompetí kontra esnan ku a keda rekonosé den e National American Advertising Awards. Ofisina di Turismo di Kòrsou (CTB) ta mira e premio internashonal ku Caribe Media Productions a risibí komo un rekonosementu ku ta mustra ku Kòrsou tá tambe un isla riku na kreatividat. Masha Pabien na Caribe Media Productions!