Partisipando den desaroyo di Cape Marie Apartments

WILLEMSTAD – Vidanova Pension Fund a presentá su mes komo un di e tres inisiadónan di e proyekto nobo Care Marie Luxury Apartments na Coral Estate. Pa esaki anteriormente e luna aki a duna e señal di inisio den presensia di diferente minister Kurazoleño. Esaki ta un di e invershonnan lokal ku kua e fondo di penshun ke yuda duna ekonomia di Kòrsou un push den e direkshon korekto.

Den su relato anual mas resien Vidanova a ekspresá su speransa pa ekonomia di Kòrsou rebibá e aña aki. Despues di un evaluashon kuidadoso di e kriterionan fiho, e fondo di penshun a disidí pa no para wak na kantu, pero pa e mes tambe duna un kontribushon supstansial i yuda lansa un desaroyo nobo ku ta kumbiní ekonomia.

Na kuminsamentu di òktober e partnernan Coral Estate Grondexploitatie, Coral Estate Sales i Vidanova a duna e señal ku por kuminsá ku konstrukshon di e 30 apartamentunan luhoso i tres penthouse superior na Coral Estate, na Bándabou. Na kuminsamentu di 2019 ta antisipá ku lo entregá e promé di e tres edifisionan ku lo lanta. E start simbóliko den forma di desvelo di un plaka komemorativo riba un pida muraya tabata na enkargo di señora Charlene Alberto, direktor di Vidanova Pension Fund, un di e akshonistanan di e proyekto. Durante e resepshon ku a sigui pa e wéspetnan den un vila na Coral Estate ku bista riba e sitio kaminda ta bai realisá Cape Marie Luxury Apartments, a brinda riba un proseso próspero di konstrukshon.

Entre e wéspetnan tabatin minister presidente Eugene Rhuggenaath, minister Steven Martina di desaroyo ekonómiko i minister Kenneth Gijsbertha di finansa. Den su diskurso na e okashon ei minister Martina a enfatisá e interes ekonómiko di e proyekto aki i el a ekspresá su apresio pa e inisiadónan ya ku e desaroyo aki nan ta mustra ku Kòrsou ta ofresé proyektonan di konstrukshon nobo di kalidat. Cape Marie Luxury Apartments ta kumpli ku un demanda di e sektor turístiko kresiente aña aden aña afó i e nesesidat pa proyektonan residensial di kalidat haltu na Kòrsou.