FUNDASHON ALTON PAAS

WILLEMSTAD, Fundashon Alton Paas a pidi un misa speshal dia 6 di yuni 2013 na Misa di Groot Kwartier, selebra pa pastor Curtis Meris pa gradisi i tambe pidi salu, forsa i protekshon pa e 3 hobennan Jurvis Lourens, Steven Cristina i Alton Paas ku dia 8 di yuni 2013 ta sali pa Carlsbad California pa risibi terapia a base di ehersisio intensivo pa mehora nan salu i drecha nan kalidat di bida.

Manera ta konosi Fundashon Alton Paas a start un proseso pa yega na fondo pa alkansa un montante pa  3 hoben  ku tin dwarslaesie bai e instituto Project Walk na Merka pa mehora nan salu. A start dia 2 di desember 2012 organisando un evento Music with Fundashon Alton Paas kaminda a pidi komunidat di Korsou pa bin yena e Kliko ku sen. Despues di e aktividat di dia 2 di desember 2012 Fundashon Alton Paas a sigui pidi komunidat, organisashon i kompanianan pa kontribui pa yuda yega e montante pa por kubri terapia pa un periodo di 6 luna. Komunidat, organisashon i kompania a kontribui ku Fundashon Alton Paas i a akumula un montante ku lo por bai kubri 3 luna. Ainda falta un montante di fl. 75.000,= pa kaba di sera e montante kompletu pa 3 luna. Fundashon Alton Paas ta konta ku e instansianan ku ainda ta pendiente pa yuda yega e montante ku falta. Pa loke ta e planning, tur kos ta kla aya na Carlsbad California pa risibi e tres hobennan kaminda nan ta bai pa logra un adelanto substansial den nan salu. Dia 10 di yuni 2013 e hobennan su programa ta start i e programa aki lo termina dia 30 di ougustus 2013. Dia 1 di september 2013 nan lo regresa Korsou. Durante e luna di ougustus 2013 e fisioterapista Brigitte Schroevers lo join nan pa siña e metodo pa ora nan bini Korsou por sigui ku e terapianan aki na Korsou. E 3 hobennan lo sali Korsou dia 8 di yuni 2013 ku e prome buelo di American Airlines pa 7:05’or di mainta. E Santu Sakrifisio di Misa lo ta na Misa di Groot Kwartier pa 7’or di anochi dia 6 di yuni 2013.  ‘Light & love ministry lo anima e misa. E tres hobennan aki i Fundashon Alton Paas ta invita pueblo di Korsou pa akompaña nan durante e misa aki i asina sigi fortifika e espiritu pa e mishon ku nan tin nan dilanti. Un petishon speshal na tur ku tin T-shirt di Fundashon Alton Paas pa asisti misa ku e T-shirt komo sosten i apresio.  Bini misa di Groot Kwartier pa asina gradisi Señor i pidi bendishon i protekshon pa e hobennan. Fundashon Alton Paas di e forma aki kier yama danki tambe na tur ku i lo sigui kontribui ku e fundashon pa asina yuda esnan ku ta sufri di dwarslaesie.