Willemstad,- La Tentashon & Broche 2k ta organisando un kompetensha di Loombands, e famoso alestiknan di kolo. Dia 1 di yüni lo tin e kompetensha aki 5or di atardi na La Tentashon. E kompetensha di e Loombands ta pa mucha di 5 pa 7 aña i di 8 pa 12 aña di edat. Durante e kompetensha aki, e muchanan lo tin ku usa nan kreatividat pa traha un diseño ku nan Loombands. Nan lo haña un kantidat di minüt pa traha riba nan propio kreashon. Lo tin diferente premio atraktivo pa e ganadónan di kompetensha. Aparte di esei nan lo haña un mesa kaminda nan mes lo por dòrn’é. Alabes nan lo tin chèns pa bende nan propio diseñonan manera kadena, armbant, yabero etc. E kompetensha lo tuma lugá bou di ora di “Atardi Mágiko” un show karga ku hopi talento kaminda lo tin payaso Eddy, Tom Presti, C-Boys & Zoëlicious. E “Loombands Competition” ta kompletamente grátis i ta algun lugá so a sobra. Por inskribí for di awor na Teatro Luna Blou òf na Time To Time, Saliña. Tin chèns te ku djabièrnè 30 di mei pa inskribí. Pa mas informashon por yama Teatro Luna Blou na 462-2209 òf Time to Time na 465-8463.