Fundashon Parke Trópikal no ta para ketu i ta siguí traha duru pa logra tur su metanan. Aqualectra a sòru pa hasi Zoolights un realidat. Aqualectra ta aportá na e desaroyo di nos Parke Trópikal dor di krea un infrastruktura nobo pa suministro di koriente pa hinter e parke. Tambe Aqualectra lo sòru pa dekorá Chuchubiweg kompleto, komo e kaya prinsipal pa yega parke. E entrada di Parke i diferente area den nos parke lo bira un espektakulo di lus nunka bisto. Tur esaki danki na e tim dinámiko di Aqualectra enkabesá pa Nareida Vicario. ZOOLIGHTS lo ta tur djaweps, djabièrnè, djasabra i i djadumingu den luna di Desèmber i e promé wikènt di yanüari, (11,12,13,14, 18,19,20,21, 26,27,28 di Desèmber i 1 ,2 i 3 di yanüari) Aparte di wak hopi arte traha di lus, lo tin arte na benta, kos di kome i bebe manera, ayaka, pan de jamon, sùlt, salmou, pekele, ham di pasku i hopi mas na bon preis i dushi músika di Pasku. Nos Zootique tambe ta habrí ku benta di diferente artíkulo pa hasi un regalo . Tur djaweps kantantenan manera Debbie Beaujon, Ilvia i Anette Bernadina lo duna nan bos komo donashon pa hasi e evento aki mas dushi, djabièrne lo tin diferente kor ku lo deleitá un i tur i tur djasabra lo tin pelikulanan di pasku ta pasa hinter anochi.
KOMPETENSIA DI LUS , Gana Nalf 3500,- Kesh!
Pa krea un ambiente ainda mas dushi, Fundashon Parke Trópikal a krea un kompentensia di lus. Un i tur, grandi i chikí por partisipá. Tur partisipante mester registrá su mes na Roosevelt center Sta Maria i Caracaasbaaiweg òf na ofisina di Parke Trópikal pagando Nafl 75,- pa inskripshon. E partisipante lo hinka man den un tómbola i saka e animal, ku usando su kreatividat, e lo tin ku krea kompletamente di lus. Tambe e partisipante lo haña instrukshon pa loke ta grandura di e obra i otro kondishonnan. Tur partisipante lo risibí un bòn di deskuento, pa kompra di e lusnan ku lo mester pa krea e obra, na Roosevelt center. Inskripshon ta habrí kaba i ta sera djabièrnè 28 di novèmber. Oraio pa bishita ZOOLIGHTS lo ta entrante 11 di desèmber di 7pm – 10 pm i entrada ta solamente NAf. 5,- pa persona. Hasi ZOOLIGHTS un tradishon di famia i disfrutá di e espektákulo di lus mas grandi di Kòrsou.