Ayera mainta Laurien Angelista sali pa Miami, Doral kaminda e lo partisipa den sertamen di Miss Universe 2015. Na Laurien su yegada ela keda eskoltá pa un pareha den trahe típiko di Kòrsou akompañá pa musika mientras ku e tabata aserká  e terminal pa despues dirigi su mes na e check in bali. Miss Kòrsou 2014, Eline de Pool tambe a hasi akto di presensia i a hasi entrega di e bandera di Kòrsou i un regalito, i dimes pasa e vibrashon i energia di positivismo pe, deseando e tur klase di éksito. Tabata un ambiente masha ameno meimei di amigu , famia, konosi- i representantenan di  CTB ku a bini huntu pa asina tuma despedida di nos máksimo embahador di beyesa ku mensahenan bunita i elokuente. Finalmente un Laurien karesmátiko manera semper a hiba un entrevita ku prensa i saka algun potrèt ku fanatikonan pa despues pasa pa sala di embarke kla pa representá nos dushi Kòrsou dígnamente. Coridja Stars Productions tambe ta uni su mes na tur e bon deseonan pa Laurien i deseé hopi suerte i éksito i ku bon Dios lo kompañ’é durante di e temporada aki.