Pa por kumpli ku palabrashonnan internashonal

WILLEMSTAD – Kámara di Komèrsio i Industria di Kòrsou por disolvé personanan hurídiko inaktivo for di e Registro Komersial atraves di e prosedimentu den e legislashon nobo ku a drenta na vigor for di 28 di desèmber 2016, pa Kòrsou por kumpli ku su obligashonnan internashonal ora aktualisá e datonan bayendo bèk te 1945.

A base di entre otro “Tax Information Exchange Agreements” ku a sera ku gobièrnunan strañero, Kòrsou mester suministrá informashon tokante personanan hurídiko na momento ku outoridatnan kompetente pidi esei. E informashon ei mester kontené dato tambe di un dirigente di e persona hurídiko en kestion. E dirigente ei ta obligá na duna informashon na outoridatnan kompetente tokante esnan envolví den e persona hurídiko i tokante su situashon finansiero.

E Global Forum on Transparency and Exchange of Information for Tax Purposes di OESO (Organisashon pa koperashon ekonómiko i desaroyo – Ingles: OECD) ta supervisá si paisnan asosiá, manera Kòrsou, ta kapas pa kumpli ku e reglanan i si e legislashon i práktika doméstiko ta kuadra. P’esei nan ta hasi un evaluashon periódikamente.

Despues di e último evaluashon di mart 2015 OESO a rekomendá pa investigá registrashon di personanan hurídiko (manera NV, BV, koperashon, asosiashon, fundashon i SPF) ku ta eksistí ainda i ku mester kumpli ku sierto rekisito legal, manera presensia di un dirigente ku ta alkansabel na e adrès registrá di e persona hurídiko. Konsekuensia di e ehersisio lo ta ku mester eliminá tur e personanan hurídiko ku no ta kumpli ku e leinan nobo, spesialmente pa loke ta e datonan di un dirigente ku ta alkansabel, for di e Registro Komersial.

Publikashon di listanan

Kòrsou tin un historia amplio riba e terenonan di servisio finansiero internashonal i di aktividatnan komersial lokal. Esei a pone ku tin un kantidat grandi di entidat inskribí den e Registro Komersial di Kòrsou, kual registro a keda introdusí na mei 1945. E ehersisio lo ta pa mira si tur e personanan hurídiko kua ta eksistí ainda ta kumpli ku e eksigensianan legal; for di 2015 a kuminsa ku repasa tur e inskripshonnan.

Riba e puntonan aki Kámara ta anunsiá ku el ta kuminsá ku ehekushon di e kambio di lei i a publiká e lista ku nòmber di personanan hurídiko ku no tin dirigente òf ku no ta alkansabel. Esnan envolví tin te ku 6 siman despues di publikashon di e lista pa ordená nan asuntunan, manera registrá na Registro Komersial un dirigente ku ta alkansabel na e direkshon di e persona hurídiko, si es ku nan ke evitá ku Kámara ta disolvé e entidat en kestion. Sino outomátikamente ta disolvé esaki i ta skrap e for di e Registro Komersial.

Publikashon di e promé di e diferente listanan ta sosodé riba e wèpsait di Kámara di Komèrsio, esta www.curacao-chamber.cw (Quick links/Proposals to dissolve). E promé lista ta kla kaba i a sali publiká riba e wèpsait.