WILLEMSTAD – Caribbean Back Office Services (CBOS) ta kontinuá ku e tan gustá lès di PowerPoint pa mucha entrante djamars 4 yüli 2017.

Ta asina ku avansé teknológiko den enseñansa ta pone ku e forma ku nos muchanan ta duna nan presentashon na skol den tempu di awor, ta otro for di algun aña pasá. Varios skol aki na Kòrsou ta pidi mayornan pa traha un presentashon riba kompiuter den e programa ‘PowerPoint’. Sinembargo, hopi mayor no tin e konosementu di kon pa traha ku e programa aki òf simplemente no tin e tempu pa kreá e presentashon. Ideal ta si e mucha mes por traha riba su presentashon na momentu ku e tin turno oral na skol. Tur mucha ku forma parti di e lèsnan di PowerPoint pa mucha ta siña kon pa traha ku e programa di moda ku e mes por hasi esaki na momentu ku e tin un presentashon na skol.

Pa fasilitá mayornan ku tin e skema poko pisá di trabou i otro kompromiso, CBOS ta brinda e posibilidat pa kada mucha ku tin 7 aña òf mas, siña traha su propio presentashon riba kompiuter. Alabes esaki ta un tremendo oportunidat pa nan kuminsa prepará pa skol avansá kaminda nan mester bai duna muchu mas tantu presentashon. E bon ta ku nos yunan ta maestro den traha ku ekiponan elektróniko manera telefon, Ipad, PlayStation, kòmpiuter personal i hopi mas. Esaki sigur ta hasi e lèsnan hopi mas fásil i komprendibel.

Mayornan por registrá e yu pa e grupo di djamars òf djasabra. E lèsnan di PowerPoint pa mucha ta tuma lugá na OTC School (Saliña Galleries B-202/6). Mayornan ku ta deseá pa nan yu tambe partisipá por tuma kontakto na 5233310. Tambe por registrá pa medio di e formulario di registrashon optenibel riba nos página di Facebook, Caribbean Back Office Services.