Fundashon Sentro pa Guia Edukashonal (SGE), e aña aki pa 17 aña konsekutivo huntu ku nos spònser prinsipal, Bo Banko Amigu, Maduro & Curiel’s Bank, a organisá e kompetensia di ‘Lesa pa otro skucha’ entre nos skolnan di fundeshi i spesial aki na Kòrsou. Den e kompetensia aki kampionnan di diferente skol di fundeshi i spesial a kompetí ku otro den ‘Lesa pa otro skucha’, lesando na papiamentu i hulandes. Ku e aktividat aki SGE huntu ku LITO i MCB a bin ta promové lesamentu di buki bou di nos muchanan, netamente komo un medio pa komuniká i komprondé teksto, konosé su kultura, su alrededor i nos mundu. ‘Lesa pa otro skucha’ komo un forma diferente di lesamentu ta plaser pa grandi i chikí i ademas ta stimulá desaroyo di idioma, konsentrashon, kreatividat i abilidat sosial serka e mucha.
Djasabra dia 25 di aprel último e 10 finalistanan di e diferente skolnan kual ta M.M.Römerschool, Glorieux College, St. Margaretha College, Marnix FO, Helfrich-Krijtschool, FO Elis Juliana-Sheila Karel, Pedro Luis Brionschool, St. Fransiscus College i Kolegio Chaya Willems a kompetí ku otro den Sentro Diplómatiko Hesu Kristu E Konstesta na Muizenberg den e kompetensia final, kaminda tabatin un ambiente tremendo i tur presente a gosa un bòl.
SGE ta hopi orguyoso ku ‘Bo Banko Amigu’, Maduro & Curiel’s Bank, a integrá e kompetensia di ‘Lesa pa otro skucha’ den su proyekto di ‘Kuida bo skol i stima bo skol’. Den kuadro di e proyekto ‘Lesa pa bo skol’ e skolnan di e ganadónan a gana premio poné disponibel pa MCB. E skol di e kampionnan ta risibí kada un NAf. 2.000,-, e di dos premio ta NAf. 1.250,- i e di tres premio ta NAf. 750,-. E skol ku a animá su partisipante mas mihó a risibí NAf. 500,-.
Aparte ku tur e amiguitunan di LITO ku a representá nan skol den e rondonan preliminar a risibí bunita regalo di LITO, e finalista i ganadónan tambe a risibí premionan individual serka LITO.
E maestronan ku a guia e finalistanan pa e kompetensia tambe e aña aki a haña un regalito komo muestra di apresio di MCB pa nan dedikashon na stimulá lesamentu bou di e muchanan.
E resultado di e final di e kompetensia ta:
E premio pa e mihó “Yell” a bai pa Pedro Luis Brionschool
Ganadornan di “Lesa pa otro skucha 2015” na Hulandes:
Ganadó apsoluto a resultá Andryñanda Prudencia di St. Franciscus College
E promé finalista ta Yanoah Rosales di Pedro Luis Brionschool
E di dos finalista ta Dehaney Emeje di Glorieux College
Ganadornan di “Lesa pa otro skucha 2015” na Papiamentu:
Ganadó apsoluto a resultá Shaydee Cras di St. Margaretha College
E promé finalista ta Derreley Binda di Kolegio Chaya Willems
E di dos finalista ta Lyaïsha Angela di Helfrich-Krijtschool
Na final di e kompetensia tur presente a haña algu di kome i bebe. Excell Arts Academy tambe a duna un bunita presentashon ora hurado a retirá pa deliberá. Sentro pa Guia Edukashonal ta yama un danki spesial tambe na e otro spònsernan ku a kere den e kompetensia aki i a kontribuí ku diferente regalo pa e 10 finalistanan: House of Style, Dolphin Academy, Boekhandel Boekplus, Boekhandel Mensings Caminada, Boekhandel Bruna, Otro Kara Tambe, PWC, Curaçao Port Authority (CPA), Banko Sentral di Kòrsou i Sint Maarten, Curiol, Refinería Isla, Algemene Spaar – en Kredietcoöperatie (ACU), Selikor, Penha & Sons, SamSom, Crown Automotive, Biblionef i Advocatenkantoor van Eps Kunneman van Doorne.