Dianan 27 i 28 di yüli ta parti karchi

Willemstad – LITO Film Festival ta e aktividat di fakansi mas popular di Maduro & Curiel’s Bank. E tradishon di LITO aki ta duna tur aña mas ku 2000 mucha e oportunidat pa wak sine grátis na The Movies. E biaha aki e ta riba djaweps 4, djabièrnè 5 i djasabra 6 di ougùstùs i amiguitunan por wak e pelíkulanan mas popular di momento ku ta Finding Dory, Ice age: Collision Course, The secret life of pets i Meester Kikker.

Entrega di karchi pa LITO Film Festival ta tuma lugá solamente riba djárason dia 27 i djaweps dia 28 di yüli na MCB su brènchnan na Saliña, Barber, Montaña, Punda, Sta. Maria, Otrobanda i Rooi Catootje. Karchi ta grátis i mester presentá ku un buki di LITO ku ta aktivo di por lo menos 3 luna bieu. Buska bo karchi lihé pasobra e kantidat di karchi ta limitá i sin karchi bo no por drenta.

Manera ta kustumber tin guianan di Bo Banko Amigu presente. Kada mucha ta risibí un (1) karchi, pero si ta nesesario muchanan bou di 6 aña ku mester di kompaño, por bin ku un mayor. E mayor aki tambe mester tin un karchi pa por drenta. Tur mucha ku bishitá e festival di pelíkula ta haña un koi bebe i popcorn i LITO tambe lo ta presente.

LITO ta konvensí ku hopi di su amiguitunan a pasa un dushi fakansi i ta disfrutando di entre otro Fakansi ku Deporte na SDK i otro dushi aktividatnan. Maduro & Curiel’s Bank i LITO, e Amiguitu Spardó, ta deseá tur mucha di Kòrsou un aña eskolar nobo hopi eksitoso.