WILLEMSTAD – Pa un konkurso di sirkunstansia Destination Curaçao a disidí pa suspendé e Living Expo pa e aña aki. E bolsa i show eksitoso aki den kurso di añanan a resultá un tremendo oportunidat pa kompania i institutonan mustra na e públiko grandi kiko nan por brinda na produkto i servisio pa den i rondó di kas, pero naturalmente tambe pa den i rondó di ofisina, etc.
Originalmente a fiha e último siman di sèptèmber pa e Living Expo di e aña aki. Esaki a kuminsá pèrta ora gobièrnu a disidí pa hustamente den e periodo ei tene elekshonnan pa Staten. E kampañanan polítiko lo hala muchu mas tantu atenshon i hopi empresa tabata ke warda wak resultado di e elekshon. Inesperadamente e menasa di orkan Matthew tambe a bin brua asuntu. No únikamente mester a hala e fecha pa e elekshonnan kasi un siman; e tim di Destination Curaçao tambe tabatin atrobe ménos tempu pa kaba di reklutá sufisiente partisipante. Organisashon di un evento di e magnitut aki ta rekerí hopi preparashon i esfuerso grandi pa hinka tur kos bon den otro. A konsiderá un ratu pa hala e fecha pa e bolsa un luna, pero e organisadó a haña mas prudente pa salta e bolsa un aña i pa for di awor kuminsá konsentrá kompletamente riba organisashon di e bolsa aki na fin di sèptèmber 2017.
Malora komersial na Kòrsou
Aparte di e sirkunstansianan menshoná tabatin un faktor mas ku a hunga un papel importante ku a kondusí na desishon drástiko aki: malora komersial bastante general na Kòrsou. E tim di benta di Destination Curaçao ta drenta serka un kantidat di potensial partisipante pa splika kiko e plannan ta kome i bebe, pero tambe pa pa tende di nan kiko nan tin planiá pa bai eksponé. For di aña pasá ya a nota un tendensia ku e aña a bira muchu mas fuerte. Mas ku nunka anteriormente e klientenan a reklamá ku nan ta pasa basta problema pa tene kabes riba awa. Nan a menshoná diferente kousa pa esei. Mas tantu nan tabata menshoná den e kombersashonnan e gastunan ya hopi haltu pa hasi negoshi (cost of doing business), e gastunan fiho relativamente haltu (ku énfasis riba e gastunan di utilidat), e echo ku kumpradónan ta mas kuidadoso pa gasta plaka i un preshon fiskal kresiendo. No únikamente e preshon di belasting ta pisa mas den último añanan; tin tambe un kobransa muchu mas agresivo di belasting loke na final di dia ta pone ku empresanan tin ménos pa gasta. Ta bini aserka ku gobièrnu, ku ta bisa di ta revitalisá ekonomia, atraves di un kompania di gobièrnu manera C-Post ta promové hustamente kompra via internèt di artíkulo den eksterior. Tin diferente kompania lokal ku ta enfrentá e konsekuensianan di esaki.
E gastunan pa partisipashon na Living Expo no por ta un motibu, pasobra esei tin añanan kaba na e mesun nivel. Awor empresanan tambe ta komprendé ku Living Expo ta un okashon ekskisito pa presentá nan produkto i servisionan na merkado, pero ora sèn ta skars na e empresa, kon ta hasi pa saka plaka pa partisipá? E klientenan a konfirmá ku e 14 edishonnan anterior di Living Expo a produsí klientela pa nan, di moda ku básikamente e ánimo pa partisipá ketu bai t’ei. Di kurason Destination Curaçao ta anhelá pa e perspektivanan pa sektor komersial drecha, di moda ku e klientenan por partisipá atrobe i ku otro aña por organisá otro bolsa di Living eksitoso den Exhibition Hall di WTC kaminda por bini atrobe ku hopi idea nobo.