Willemstad – Teniendo kuenta ku tin hopi bientu riba e seru kaminda Mirador na Aeropuerto di Kòrsou ta situá, a skohe pa un dak traha di material di canvas ya ku esaki ta mas adekuá den e tipo di sirkunstansianan aki i kual ta safe. Curaçao Airport Partners a tuma nota ku e material a kuminsa lòs na sierto lugá, i huntu ku e arkitekto i e kontratista ta tumando paso pa hasi adaptashon na e dak. Alegashon ku Mirador ta traha ku sèn di komunidat
CAP a tuma nota di informashon inkorekto ku ta sirkulá, den kua ta indiká ku a traha Mirador ku sèn di komunidat, kual no ta berdat. CAP ta invertí $36 mion doler den proyektonan pa desaroyá aeropuerto durante e añanan benidero i un di e proyektonan ta e mehorashon di e area pùbliko kaminda por wak avion, esaki ku e rekuerdo di e Mirador di antes na mente. CAP ta rekonosé e importansha históriko di e Mirador pa loke ta trata e eksperensha emoshonal i soshal na aeropuerto i pues a dediká e Mirador na pueblo di Kòrsou. Loke anteriormente tabata un area di santu kaminda algun outo por a parker, awor ta un area komodo i espasioso ku un bista spektakular di avionnan ku ta subi i baha, protekshon kontra solo i 18 lugá pa parker inkluso 2 lugá di parker pa personanan ku un desabilidat.