CAP ta kambia pa mesun tipo di mashin ku tin na Schiphol i Zürich Airport

Willemstad – Curaçao Airport Partners (CAP) lo kambia su fasilidatnan relatá na parker outo na Aeropuerto di Kòrsou pa un sistema nobo, i a kontratá e mesun kompania ku a krea e sistema na entre otro Schiphol, Zürich Airport i London Heathrow Airport. CAP lo kuminsá implementá e sistema nobo pa fin di Mart.

Pa realisá e proyekto aki, CAP a kontratá e kompania SKIDATA, kual ta un kompania situá na Oustria ku ta spesialisá entre otro riba maneho di parkermentu na aeropuerto. SKIDATA a implementá e sistema di parker pa aeropuertonan grandi na Europa, entre otro Schiphol. Ademas CAP ta kolaborando ku partnernan lokal p’asina por ofresé mas método di pago den e sistema nobo, entre otro pago ku credit card, karchi di banko, sèn di papel òf moneda. Ademas lo kambia e aparatonan riba e tereno di parker, pues e barera na entrada i salida (slagboom) i e mashinnan korespondiente, pa vershonnan nobo. Lo aloká e mashinnan di pago den e área di Yegada i serka di e Departures Terminal.