Willemstad – Maduro & Curiel’s Bank, E Amigu di Deporte, un biaha mas ta demostrá ku e ta para tras di deporte en general na Korsou.  MCB ta konsiente ku desaroyo di deporte bou di nos hubentut i adultonan ta masha importante pa nos tin un Pais sano. Un sosten finansiero na un área di deporte ta duna e Direktiva di un deporte mas energia i entusiasmo pa nan sigui traha pa nan engrandese nan deporte. Esaki lo yuda pa nos sigui haña mas deportista riba nos dushi Pais i sigui krea mas Bon Yu’i Korsou. Ku e desishon pa djòin Curaçaose Softball Bond (CSB) pa loke ta e sekshon di Sòftbòl Femenino, MCB awor ta duna sosten supstansial na 5 área di deporte; Atletismo, Futbol FFK (Liga MCB i Liga LITO), RBI baseball pa hubentut, Gòlf i C.S.B Sòftbòl Femenino. E motibunan prinsipal ku MCB a skohe pa yuda e deporte di Sòftbòl Femenino ta pa e echo ku Sòftbòl Femenino meresé e oportunidat pa bira bek un di e deportenan di mas popular na Korsou. Nos tin hopi deportista femenino tambe ku meresé un chèns pa desaroyá nan talento. E disiplina general bou di kua ta hunga e kampeonato di sòftbòl femenino di CSB ta di nivel hopi haltu i ta un di e deportenan ku ta kresiendo rápidamente pa loke ta talento i fanátiko. Aparte di esaki, Direktiva di CSB bou di guia di su presidente señor Chati Constansia ta hinkando hopi energia i entusiasmo pa engrandese e deporte aki i ku ta garantia pa nos tin otro kampeonato di Sòftbòl Femenino eksitoso. Esaki ta algu importante ku no por keda sin tuma na konsiderashon ora a evaluá e patrosinio di MCB. MCB su patrosinio ta konsistí banda di e parti finansiero tambe e parti di unifòrm pa direktiva, unifòrm di umpire, unifòrm pa e personal enkargá ku bar i kushina i tambe promoshon di e weganan di sòftbòl.

Premio “MCB MVP 2013”

E aña aki MCB konhuntamente ku CSB a introdusí e premio “MCB MVP”. Despues di kada wega di kampeonato Sòftbòl Femenino doble A 2013, e skorer i empayernan ku tabata aktivo den e weganan, tin e tarea pa skohe, teniendo kuenta ku e faktor disiplina, e hungadó ku pa nan a kontribuí mas na e viktoria pa nan ekipo. Na final di e kampeonato e hungadó ku tin mas menshon di “MCB MVP”durante kampeonato 2013 lo keda nombra komo e “MCB MVP 2013”. E “MCB MVP 2013” i su ekipo lo risibí un bunita premio serka MCB. Meta prinsipal di e gesto aki ta pa stimulá nos sòftbolistanan pa tur wega di nobo nan pone atenshon riba disiplina i nan duna tur ku tin pa asina kontribuí positivamente na nan ekipo. E premio “MCB MVP 2013” ta ilustrá ku bon prestashon individual ta hopi importante, pero un bon komportashon i kontribushon pa ku bo tim ta muchu mas importante. E hungadó mester kontribuí pa su tim sali viktorioso i tin un bon komportashon pa e bini na remarke pa e premio “MCB MVP 2013”.

Apertura kampeonato CSB/MCB 2013

Maduro & Curiel’s Bank N.V., spònser prinsipal di Sòftbòl Femenino huntu ku CSB, ta invitá tur fanátiko di deporte i en partikular esnan di bon sòftbòl Femenino pa nan ta presente na Sabana Ballpark djaweps promé di ougùstùs pa inisio di e kampeonato 2013 di Sòftbòl Femenino CSB/MCB. Djaweps awor dia promé di ougùstùs tin e wega internashonal pa 7or di anochi kaminda di USA Team ta hunga kontra SOTO/CMTC i pa 9or di anochi e wega inougural di kampeonato 2013 ku ta Pichingolo KIA/Nissan kontra di Eagle Softex. Ku e sosten na e deporte Sòftbòl Femenino, MCB, É Amigu di Deporte ta sigui duna su kontribushon pa mas desaroyo sano na Kòrsou.