… un atardi kontentu ku Fundashon Totolika…

WILLEMSTAD- Mart 2015- Siman pasá a selebrá dia internashonal di síndrome di down. Un dia riba kual tantu personanan ku síndrome di down komo esnan ku ta biba i traha ku nan ta partisipá den evento i aktividatnan spesial ku ta krea konsientisashon públiko. Curaçao Marriott Beach Resort & Emerald Casino den kuadro di nan programa komunitario ‘Spirit to Serve’ tabata anfitrion pa e promé evento komunitario pa e aña aki dediká na fundashon Totolika i muchanan ku Down Syndrome. E evento a tuma lugá dia 21 di mart último den ballroom di Curaçao Marriott Beach Resort ku a wòrdu transformá den un teater di pelíkula ku tema di bestia. Durante un atardi ameno ku a kuminsá 2’or e muchanan a disfrutá di un pelíkula tokante kachó kombiná ku un segmento presentá pa i ‘iAnimal’ ku a siña e muchanan kon pa kuida un kachó i kon lif un kachó por ta. ‘iAnimal’ a trese e kachónan ku a hasi truko pa e muchanan mira, esaki a resultá den un ‘hit’ total. Ademas di esaki e muchanan por a rekreá den un skina spesial. Nan tabata por a disfrutá di pasaboka tradishonal di teater manera popcorn, hòdòk i nachos/ chips. Curaçao Marriott Beach Resort & Emerald Casino por mira bèk riba un selebrashon di dia internashonal di ‘Down Syndrome’ na unda e muchanan a pasa un atardi hopi ameno. Fundashon Totolika a keda sumamente kontentu ku e aktividat spesial aki ku kontribuí na rekreashon di e muchanan. Un danki spesial ta bai na Top 1 Toys pa ko-patrosiná e aktividat.

Tokante Fundashon Totolika:

Fundashon Totolika a wòrdu lantá na sèptèmber 1973 pa mayor, amigu/a i famianan di personanan ku un limitashon di kapasidat intelektual. E ophetivo di e fundashon ta pa brinda un mihó bibá na personanan ku nesesidat spesial. Fundashon Totolika pa hopi aña a bin ta traha riba guia pa mayornan di muchanan spesial, krea konsiensia den komunidat i yuda establesé instansianan.