Riba tur 4 anochi di tumba na CFC

WILLEMSTAD- Aña 2015 no ta un eksepshon, Maduro & Curiel’s Bank, Bo Banko Amigu, un biaha mas ta un prestigioso Branding Partner di Festival di Tumba. Ku esaki Bo Banko Amigu ta demostrá ku e ta sigui ta é Banko di Tumba i ta kere den nos artistanan dunando asina su sosten na nos músika i kultura. E aña aki ta un aña hopi spesial pasó e festival di músika i artista lokal aki ta kumpli 45 aña. Esaki ta hasi ku Festival di Tumba ta e festival di músika i kanto mas grandi ku Kòrsou konosé i MCB, é Banko di Tumba no por keda afó ku kampañanan pa sostené e totalidat. Banda ku MCB a bende un kantidat di karchi na preis redusí durante inskripshon di tumba, durante tur 4 anochi di e festival tur presente tin chèns di gana un Kompa Leon Gift Card ku nan por gasta sea na Curaçao Festival Center mes òf na kualke un di e 4000 komersiantenan ku ta aseptá Kompa Leon. Festival di Tumba ta keda un oportunidat úniko pa komunidat i turistanan mira mas ku 400 artista lokal presentá riba stage durante 4 anochi na Curaçao Festival Center presentando komposishonnan propio. Maduro & Curiel’s Bank ta invitá pueblo di Kòrsou pa bin apoyá nos músikonan na Festival di Tumba 2015 dianan 26, 27, 28 i 30 di yanüari próksimo. Asosashon di Músiko i Artista Kòrsou por sigui konta ku sosten di Bo Banko Amigu pa sigui engrandesé NOS Festival di Tumba.